دبئی سے مینگلور اُترنے والی فلائٹ موسم میں خرابی کی وجہ سے کوچی ائرپورٹ منتقل
مینگلور 13/ اپریل (ایس او نیوز) دبئی سے مینگلور انٹرنیشنل ائرپورٹ اُترنے والی فلائٹ کو خراب موسم کی وجہ سے پڑوسی ریاست کیرالہ کے کوچی ائرپورٹ منتقل کیا گیا ہے۔ کوچی انٹرنیشنل ایرپورٹ کے ڈائرکٹر اے سی کے نائیر نے بتایا کہ دبئی۔مینگلور ائیرانڈیا فلائٹ جسے مینگلور ائرپورٹ پر لینڈکرنا تھا، رات کو موسم اچانک خراب ہونے کی وجہ سے فلائٹ کے راستہ کو بدل کر کوچی ائرپورٹ میں موڑا گیا۔
فلائٹ میں 118 مسافر سفر کررہے تھے اور فلائٹ کو منگل کی صبح 12:30am کو مینگلور کے بجپے انٹرنیشنل ائرپورٹ پر اُترنا تھا لیکن رات کو اچانک موسم خراب ہوگیا، طوفانی ہواوں کے ساتھ بادلوں کی گڑگڑاہٹ شروع ہوگئی، کافی تیز بجلیاں بھی کوند رہی تھی جس کو دیکھتےہوئے آخری منٹ میں فلائٹ کو کوچی کی طرف موڑنا پڑا۔
یاد رہے کہ گذشتہ دو تین دنوں سے بالخصوص رات کے اوقات میں مینگلور اورضلع جنوبی کینرا کے بعض علاقوں میں طوفانی ہواوں کے ساتھ ہلکی بارش ہورہی ہے۔ محکمہ موسمیات نے بھی اس تعلق سے جانکاری دی ہے کہ ساحلی اور ملناڈ علاقوں میں ہوا کا دباو زیادہ ہونے کی وجہ سے ساحلی کرناٹکا میں 16 اپریل تک موسلادھار بارش ہوسکتی ہے۔ محکمہ موسمیات کی جانب سے ساحلی علاقوں کو ایلّو الرٹ بھی جاری کیا گیاہے۔
