بھٹکل انجمن کالج کے سابق پروفیسراے ڈی مُلا بیلگام میں انتقال کرگئے؛ بعد عشاء تدفین
بھٹکل 29/ جنوری (ایس او نیوز) انجمن آرٹس ،سائنس اینڈ کامرس کالج بھٹکل کے سابق فزیکس ہیڈ آف دی ڈپارٹمنٹ پروفیسر عبدالغنی مُلّا عرف اے ڈی مُلّا (70) آج پیر کو اپنے آبائی گائوں بیلگام میں انتقال کرگئے۔ انا للہ و انا الیہ راجعون۔ بتایا گیا ہے کہ ان کو گردوں کی شکایت تھی اور آخری وقت دونوں گردے فیل ہوگئے تھے۔
موصوف نے سن 1971 سے 2006 تک یعنی 35 سالوں تک بھٹکل انجمن کالج میں اپنی خدمات انجام دی اور ہزاروں طلبہ کو فائدہ پہنچایا۔طلبا ان کی بے حد عزت کرتے تھے، ہنس مکھ اور سنجیدہ انسان تھے، تعلیم کے میدان میں نوجوانوں کو آگے بڑھانے ہمیشہ کوشاں رہتے تھے۔ ان کے شاگردوں میں انجمن کے جنرل سکریٹری جناب صدیق اسماعیل صاحب بھی شامل ہیں۔ کالج سے ریٹائرڈ ہونے کے بعد انہوں نے کچھ عرصہ تک رابطہ سوسائٹی میں پی یو سی دوم کے طلبہ کے لئے کوچنگ کلاس کا بھی اہتمام کیا تھا۔
ان کو چار بیٹے ہیں جس میں تین انجینر اور ایک ڈاکٹر ہے۔انہوں نے اپنے چار لڑکوں سمیت بیوہ اور ہزاروں طلبا کو بھی سوگوار کرکے خالق حقیقی کے پاس چلے گئے، بتایا گیا ہے کہ بعد نماز عشاء بیلگام میں ہی ان کی تدفین عمل میں آئے گی۔
ان کے انتقال پر انجمن حامئی مسلمین بھٹکل کے صدر جناب عبدالرحیم جوکاکو، جنرل سکریٹری جناب صدیق اسماعیل، کالج بورڈ سکریٹری جناب جاوید حُسین آرمار سمیت دیگر ذمہ داروں نے گہرے دکھ کا اظہار کیا ہے اور گھروالوں کے ساتھ اظہار تعزیت کی ہے۔
قائد قوم ڈاکٹر ایس ایم سید خلیل الرحمن،مجلس اصلاح و تنظیم بھٹکل کے صدر جناب قاضیاء مزمل، جنرل سکریٹری جناب محی الدین الطاف کھروری سمیت بھٹکل کے کئی شاگردوں نے ان کی موت پر گہرے دکھ کا اظہار کرتے ہوئے ان کے حق میں مغفرت کی دُعا کی ہے۔ اللہ رب العزت ان کی بھرپور مغفرت فرمائے اور تمام پسماندگان کو صبر جمیل عطا فرمائے۔اٰمین
