الہ آباد ہوائی اڈے پر سابق آئی اے ایس افسر کننن گوپی ناتھن کو حراست میں لیا گیا؛ شہریت بچاو سیمنار میں شرکت کرنے جارہے تھے
پریاگراج،19 /جنوری(آئی این ایس انڈیا) کیرل کے سابق آئی اے ایس افسر کننن گوپی ناتھن کے پریاگراج میں ایئر پورٹ پر پہنچتے ہی انہیں حراست میں لے لیا گیا۔ پولیس نے اتوار کو اس کی اطلاع دی۔گوپی ناتھن ہفتہ کو دہلی سے یہاں شہریت بچاؤ، آئین بچاؤ، جمہوریت بچاؤ‘ کے معاملے پر آل انڈیا پیپلز فورم کی طرف سے منعقد دو گھنٹوں کی سیمینار سے خطاب کرنے کے لئے پہنچے تھے۔
گوپی ناتھن کو ایئرپورٹ سے باہر نکلنے سے روکنے کے بارے میں ٹویٹ کرنے کے بعد انہیں حراست میں لئے جانے کی بات سامنے آئی۔سابق آئی اے ایس افسر نے کہاکہ جہاز سے نکلنے کے بعد دس پولیس اہلکار اُن کے پاس آئے اور اُن سے شناخت پوچھی۔جب گوپی ناتھن نے انہیں اپنا نام بتایا تو وہ اُنہیں وی آئی پی لاؤنج لے کر گئے اور اس کے بعد وہاں سے اُنہیں کسی سیکورٹی کمرے میں لے جایا گیا۔
انہوں نے مزید کہاکہ پولیس نے مجھے الہ آباد سے روانہ ہونے کے بعد میرے منصوبوں کے بارے میں پوچھا اور جب میں نے انہیں بتایا کہ مجھے ہفتہ کی رات دہلی سے بوکارو کے لئے فلائٹ لینی ہے، تو انہوں نے مجھے واپسی کی پرواز سے دہلی بھیج دیا۔
بتا دیں گوپی ناتھن اس وقت سرخیوں میں آئے تھے جب دفعہ 370 کے رد ہونے کے بعد انہوں نے اپنی نوکری سے استعفیٰ دے دیا تھا۔اس وقت انہوں نے دفعہ 370 کے ہٹانے کو جموں کشمیر کے لوگوں کے بنیادی حقوق کی خلاف ورزی کہا تھا۔
