کاروار 20؍اپریل (ایس او نیوز) ضلع شمالی کینرا میں پارلیمانی انتخاب کے پس منظر میں مائکرو آبزرورس کے طور تعینات کیے گئے 200سے زائد افراد کو انتخابی نگراں افسر نوین ایس ایل نے خصوصی تربیت دی۔
انہوں نے کہا کہ پولنگ بوتھ میں رازداری برقرار رکھنے اور دیگر معاملات میں قانون کے مطابق عمل کرنے کے سلسلے میں جہاں کہیں بھی کوتاہی نظر آئے اس کی نشاندہی کرنا اور انتخابی نگراں کو اس کی اطلاع دینا مائکرو آبزرورس کی ذمہ داری ہے۔مائکرو آبرزرورس کو سب سے پہلے یہ بات جان لینی چاہیے کہ وہ لوگ الیکشن بوتھ کے افسران نہیں ہیں، بلکہ انہیں الیکشن آبزرور کی طرف سے نامزد کیا گیا ہے۔پولنگ صحیح ڈھنگ سے ہورہی ہے یا نہیںیہ دیکھنا اور بوگس ووٹنگ کے سلسلے میں نظر رکھنایا پھر بوتھ افسران میں سے کوئی کسی پارٹی کے لئے کام کرنے جیسے معاملوں پر نظر رکھنااور ایسے کسی بھی معاملے کی خبر الیکشن آبزرور کو دینا ان کی ذمہ داری ہے۔
ضلع شمالی کینرا میں 23اپریل کو پولنگ ہونے والی ہے ۔ 22اپریل کو تمام مائکروآبزرورس کو مختلف پولنگ بوتھس کے لئے نامزدکردیا جائے گا۔ان مائکروآبزرورس کو جس پولنگ بوتھ پر متعین کیاجائے گاوہیں پر اپنا حق رائے دہی استعمال کرنے کے لئے خصوصی اجازت نامہ بھی دیا جائے گا۔اگر کوئی کسی دوسرے حلقے کا فرد مائکرو آبزرور کے طور پر تعینات کیا گیا ہے تو پھر اس کے لئے ڈاک کے ذریعے اپنا ووٹ دینے کی سہولت حاصل رہے گی۔
ضلع ڈپٹی کمشنر اورالیکشن آفیسرڈاکٹرہریش کماراور ضلع پنچایت چیف ایکزیکٹیو آفیسر ایم روشن نے مائکروآبزرورس کے سوالات کے جوابات دئے۔ اس موقع پر ایڈیشنل ڈی سی ناگراج سنگریر، میونسپل کمشنر ایس یوگیش راؤ وغیرہ موجود تھے۔