کاروار میں لاری اور بائک کی ٹکر؛ بائک سوار کی موقع پر موت
کاروار 12 مارچ (ایس او نیوز) تعلقہ کے چیتاکول نیشنل ہائی وے پر ہوئے سڑک حادثہ میں بائک سوار کی جائے وقوع پر ہی موت واقع ہوگئی جب اس کی بائک مخالف سمت سے آنے والی مچھلیوں سے بھری لاری کی زد میں آگئی۔ حادثہ منگل دوپہر کو پیش آیا۔
مرنے والے کی شناخت قریبی علاقہ کے پرکاش یشونائک (69) کی حیثیت سے کی گئی ہے۔
اطلاع کے مطابق پرکاش اپنی بائک پر بیتنائک واڑہ سے سداشیو گڑھ جانے کے لئے نکلا تھا، وہ جیسے ہی اندرونی روڈ سے نیشنل ہائی وے پر اپنی بائک لایا، اسی دوران کاروار سے گوا کی طرف جانے والی مچھلیوں سے بھری تیزرفتار لاری اس کی بائک سے ٹکراگئی۔ حادثہ چیتاکول نیشنل ہائی وے پرناگاپونڈ نامی مقام پر پیش آیا۔
چیتا کول پولس نے لاری ڈرائیور کو گرفتار کرلیا ہے، اور معاملہ درج کرتے ہوئے چھان بین کررہی ہے۔
