بھٹکل:10؍دسمبر(ایس اؤ نیوز)تعلقہ میں جاری قومی شاہراہ فورلین کے تعمیراتی کاموں سے تعلقہ کے منکولی، ماروتی نگر، مٹھلی ، موڈبھٹکل کے علاقوں کے عوام بارش کے موسم میں کافی مشکلات سے دوچار ہوئے ہیں، مسائل کے حل پر دوبارہ غوروفکرکرنے کے لئے عوامی میٹنگ کا مطالبہ لےکر بھٹکل منکولی اور ماروتی نگر ترقی کمیٹی کی جانب سے منگل کو بھٹکل کے اسسٹنٹ کمشنرساجد ملا کو میمورنڈم دیاگیا۔
میمورنڈم میں کہاگیا ہےکہ بارش سے قبل ہی درپیش مسائل کو لےکر اس وقت کے اے سی اور ضلع نگراں کاروزیر کو متوجہ کئے جانےکے بعد اے سی ، ہائی وے اتھارٹی اور بلدیہ افسران کے ساتھ ایک مشترکہ میٹنگ کے دوران قومی شاہراہ کے دونوں کناروں پر بارش کے پانی بہاؤ کے لئے گھٹر اور شمس الدین سرکل سے راگھویندر مٹھ تک سرویس روڈ تعمیر کرنے سمیت کئی مسائل کو پیش کرتے ہوئے فوری کارروائی کی مانگ کی گئی تھی۔ اس وقت اے سی نے بھی ہائی وے اتھارٹی کے افسران کو توجہ دلا کر مسائل کو حل کرنے کا تیقن دیاتھا۔ اب بارش کا موسم ختم ہوچکاہے لیکن مسائل کے جوں کے توں باقی ہیں، کوئی کارروائی نہیں کی گئی ہے۔ اس سلسلے میں عوام کو یہ حق پہنچتاہے کہ وہ مسائل کے حل کو لےکر کیا کچھ کارروائی ہوئی ہے اس تعلق سے جانکاری حاصل کریں، اس لئے فوری طورپر ایک مشترکہ عوامی میٹنگ طلب کرنے کا مطالبہ میمورنڈم میں کیاگیاہے۔ اس موقع پر کمیٹی کے صدر ستیش کمار، اعزازی صدر گنپتی پربھو، جنرل سکریٹری ناگراج، خازن اشوک ہیگڈے، شری نواس پڈیار، وینکٹیش نائک ، شنکر شٹی ، امیش شیٹھ وغیرہ موجود تھے۔