بی جے پی کارپوریٹر دیواکر پانڈیشور منگلورو کے نئے میئر منتخب
منگلورو، 29/فروری (ایس او نیوز ) کنٹونمنٹ وارڈ کے بی جے پی کارپوریٹر دیواکر پانڈیشور کو منگلورو سٹی کارپوریشن (ایم سی سی ) کا نیا میئر منتخب کیا گیا ۔کولائی کی کارپوریٹر ویدواتی ڈپٹی مئیر منتخب ہوئی۔میئر کا الیکشن ایم سی سی کے کانفرنس ہال میں منعقد ہوا تھا۔
تمام 60 کارپوریٹرس ، دو ارکان اسمبلی وید ویاس کا منت اور بھرت وائی شیٹی اور ایون ڈی سواز ایم ای سی نے اپنے حق رائے دہی سے استفادہ کیا جبکہ ایم پی نلن کمار کٹیل موجود نہیں تھے۔ مختلف محکموں کی قائمہ کمیٹیوں کا بھی انتخاب عمل میں آیا۔
کانگریس نے دونوں عہدوں کے لئے اپنے امیدوار کھڑے کیے تھے۔ کیشو کو جنہیں میئر عہدہ کے لیے نامزد کیا گیا تھا ایم ایل سی ووٹ کے بشمول 15 ووٹ حاصل ہوئے۔
ڈپٹی میئر کی امیدوار زینت شمس الدین جنہیں ایس ڈی پی آئی کی حمایت حاصل تھی ، کو 17ووٹ حاصل ہوئے ۔ جبکہ دونوں بی جے پی امیدواروں کو 46 ووٹ حاصل ہوئے جن میں ان کے دو ارکان اسمبلی کے ووٹ بھی شامل تھے۔ 12/نومبر کو منعقد 60 رکنی کارپوریشن کو نسل کے الیکشن میں بی جے پی کو 44 سیٹوں جبکہ کانگریس کو صرف 14 سیٹوں پر کامیابی حاصل ہوئی تھی۔