برسات کے موسم میں عوام کو تکلیف نہ پہنچے۔نیشنل ہائی وے ٹھیکیدار کمپنی کو ڈپٹی کمشنر کی ہدایت
کاروار،21/جون (ایس او نیوز) ضلع شمالی کینرا کے ڈپٹی کمشنر ڈاکٹر ہریش کمارنے نیشنل ہائی وے66 توسیعی منصوبے کی ٹھیکے دار کمپنی آر بی آئی کے جنرل منیجر کو مراسلہ لکھ کر مطالبہ کیا ہے کہ تعمیری کام کی وجہ سے برسات کے موسم میں عوام کو کسی بھی قسم کی تکلیف نہیں پہنچنی چاہیے۔
خیال رہے کہ تعمیری کام کی وجہ سے ہرسال برسات کے موسم میں عوام کو بڑی تکالیف کا سامنا کرنا پڑتاہے۔ کیونکہ سڑک پر اور سڑک کے کنارے جگہ جگہ گڈھے رہنے اور برساتی پانی کی نکاسی کا انتظام نہ ہونے کی وجہ سے بہت سی دشواریاں پیدا ہوجاتی ہیں اور سڑک کے قریب رہائشی مکانات والوں کے لئے برسات کا موسم ایک مصیبت بن جاتا ہے۔تیز بارش ہونے کی صورت میں پہاڑ ی زمین کھسکنے کے واقعات بھی پیش آتے ہیں۔گزشتہ سال اسی توسیعی کام کی وجہ سے کمٹہ میں جان لیوا حادثہ بھی پیش آیا تھا۔نامناسب انداز میں تعمیری کام کی وجہ سے موٹر سواریوں کو بھی بہت زیادہ مشکلات پیش آتی ہیں۔ان سب مسائل کو سامنے رکھتے ہوئے ڈی سی نے ٹھیکے دار کمپنی کو تمام احتیاطی اقدامات کرنے کی ہدایت دی ہے۔