نئی دہلی،27/فروری (ایس او نیوز/ایجنسی) شمال مشرقی دہلی میں لوگ دہشت کے سائے میں زندگی گزار رہے ہیں۔ اس درمیان خفیہ بیورو (آئی بی) کے ساتھ کام کرنے والے ایک 26 سالہ نوجوان کی لاش شمال مشرقی دہلی واقع چاند باغ سے برآمد ہونے کے بعد لوگوں میں مزید خوف دیکھنے کو مل رہا ہے۔ پولس ذرائع کا کہنا ہے کہ بدھ کی دوپہر چاند باغ علاقہ میں ایک نالہ سے انکت شرما کی لاش برآمد ہوئی جو کہ خفیہ بیورو کے لیے کام کرتے تھے۔ وہ 2017 سے خفیہ بیورو سے جڑے ہوئے تھے۔

میڈیا ذرائع سے موصول ہو رہی خبروں کے مطابق انکت شرما کھجوری خاص علاقہ میں اپنی فیملی کے ساتھ رہتے تھے۔ وہ منگل کی شام سے ہی لاپتہ تھے اور مبینہ طور پر انھیں گھر کے پاس سے ہی کسی نے اٹھا لیا تھا اور بعد ازاں ایک گروپ نے ان پر حملہ کیا تھا۔

پولس کے ایک سینئر افسر نے میڈیا سے بات کرتے ہوئے کہا کہ انکت شرما کے ایک رشتہ دار کے مطابق منگل کی صبح ان کے گھر کے پاس ہی سڑک پر ایک گروپ نے پتھر بازی شروع کر دی تھی۔ فیملی کے کچھ لوگوں نے انکت کو بلایا اور انھیں بچانے کے لیے کہا۔ وہ سڑک پر پہنچے لیکن گروپ نے انھیں روک لیا۔ وہ انھیں پیٹنے لگے اور اپنے ساتھ لے کر چلے گئے۔ پولس کا کہنا ہے کہ ان کے والدین نے ان سے کہا کہ وہ نالے میں دیکھیں جہاں سے بالآخر انکت شرما کی لاش برآمد ہوئی۔

قابل ذکر ہے کہ انکت کے والد دیویندر شرما بھی خفیہ بیورو میں ہیڈ کانسٹیبل ہیں اور ان کے مطابق پہلے انکت کی پٹائی کی گئی اور پھر اسے گولی مار کر ہلاک کر دیا گیا۔ پولس نے لاش کو قبضہ میں لے کر پوسٹ مارٹم کے لیے جی ٹی بی اسپتال بھیج دیا ہے۔