نئی دہلی،یکم جون (ایس او نیوز/آئی این ایس انڈیا) دہلی ہائی کورٹ نے جمعہ کو اتحاد، بھائی چارہ اور قومی سالمیت کوفروغ دینے کے لیے یکساں سول کوڈ کے مطالبہ کرنے والی عرضی پر مرکز سے جواب مانگا ہے۔چیف جسٹس راجندر مینن اورجسٹس برجیش سیٹھی نے وزارت داخلہ اور ہندوستانی لاء کمیشن کوبھی نوٹس جاری کرکے معاملے پران کی رائے مانگی ہے۔بھارتیہ جنتا پارٹی (بی جے پی) کے لیڈر اشونی کمار اپادھیائے نے یہ عرضی دائر کی ہے۔پیشے سے وکیل اپادھیائے نے عرضی میں دلیل دی ہے کہ حکومت آئین کے آرٹیکل 44 کے تحت یکساں سول کوڈ نافذ کرنے میں ناکام رہی ہے۔یکساں سول کوڈ مختلف مذہبی کمیونٹیز کے مذہبی کتابوں اور رسوم و رواج پر مبنی ذاتی قوانین کی جگہ لے گا۔پٹیشن میں کہا گیا کہ گوا میں 1965 سے یکساں سول کوڈ نافذہے جو اس کے تمام باشندوں پرنافذہوتاہے۔یہ اس معاملے میں واحد ریاست ہے۔