جنوبی کینرا اور اڈپی ضلع میں تھم نہیں رہا ہے کورونا کا قہر۔ اموات اور نئے معاملات کی تعداد میں ہورہا ہے مسلسل اضافہ
منگلورو،19؍جولائی (ایس او نیوز) جنوبی کینرا میں سنیچر کے دن کورونا سے مزید 4افراد کی موت واقع ہوئی ہے جس کے ساتھ ہی یہاں مرنے والوں کی تعداد بڑھ کر 75ہوگئی ہے، جن میں سے 12افراد کا تعلق دوسرے اضلاع سے ہے۔ اس کے علاوہ کل ایک ہی دن میں 237افراد کی جانچ رپورٹ پوزیٹیو نکلی ہے۔
اس دوران سنیچر کے جملہ 109لوگوں کو صحت یاب ہونے پرمختلف اسپتالوں اور کیئر سینٹروں سے چھٹی دی گئی ہے، جس کے ساتھ اب تک صحت یا ب ہونے والوں کی تعداد 1387ہوگئی ہے اور فی الحال 1,848زیر علاج ہیں۔محکمہ صحت کی رپورٹ کے مطابق الال شہر میں ایک سالہ بچے کے ساتھ جملہ 10 لوگوں کی رپورٹ پوزیٹیو آئی ہے۔ان میں کرناٹکاریزرو پولیس کاایک اہلکار، اس کی بیوی اور بچے بھی شامل بتائے جاتے ہیں۔
محکمہ ڈاک کے دو اہلکاروں کی کووِڈ رپورٹ پوزیٹیو نکلنے کے بعد کل 20جولائی کو منگلورو کے 13پوسٹ آفس کو مکمل بند رکھا جائے گا۔معلوم ہوا ہے کہ کورونا سے متاثر ہونے والے منگلورو ہیڈ پوسٹ آفس کے دواہلکارہیں۔اور ان کی ذمہ داری ’کیش اوور‘ کی رہنے کی وجہ سے وہ شہر کے مختلف ڈاک دفتروں میں جایا کرتے تھے۔
ادھر اڈپی سے ملنے والی رپورٹ کے مطابق18جولائی سنیچر کے دن جملہ 109افراد کی رپورٹ پوزیٹیواور292لوگوں کی رپورٹ نگیٹیو نکلی ہے، جس کے ساتھ تاحال متاثرین کی تعداد2,088ہوگئی ہے۔اس کے علاوہ کل ایک ہی دن میں 3متاثرین کی موت واقع ہونے کے بعد اب تک ضلع میں کورونا سے مرنے والوں کی تعدادبڑھ کر 11ہوگئی ہے۔کل موت کا شکار ہونے والوں میں دو عمررسیدہ متاثرین کے علاوہ ایک 22سالہ نوجوان لڑکی بھی شامل ہے۔
کنداپور پولیس اسٹیشن کے اسسٹنٹ سب انسپکٹر کو کورونا لاحق ہونے کے بعد اسٹیشن کو پوری طرح سیل ڈاؤن کیا گیا ہے۔بتایا جاتا ہے کہ 54سالہ اے ایس آئی ہائی وے پر پٹرولنگ کی ذمہ داری اسی گاڑی میں انجام دے رہا تھا، جس کے ڈرائیور اور دوسرے اے ایس آئی کی رپورٹ گزشتہ دنوں پوزیٹیو نکلی تھی۔