آئی پی ایل: چنئی سپر کنگز پر کووڈ-19 کا سایہ، ایک ہندوستانی کھلاڑی سمیت 10 اراکین کورونا پوزیٹیو
دبئی،29؍اگست (ایس او نیوز؍ایجنسی) انڈین پریمیر لیگ (آئی پی ایل) کی فرنچائز ٹیم چنئی سپر کنگز (سی ایس کے) کے ایک ہندوستانی کھلاڑی سمیت کم از کم دس اراکین کو کورونا وائرس (کووڈ-19) سے متاثر پایا گیا ہے۔ متحدہ عرب امارات (یو اے ای) کے دوبئی میں ان کے ہوٹل میں سی ایس کے کھلاڑیوں اور معاون عملے کی کورونا وائرس کی جانچ کی گئیں اور ٹیم کے 10 اراکین کے مثبت ہونے کی اطلاع ہے۔
آئی پی ایل کے کووڈ-19 پروٹوکول کے مطابق ٹیم کے تمام کھلاڑیوں کو متحدہ عرب امارات پہنچنے کے فوراً بعد ہوائی اڈے پر کورونا وائرس کی جانچ کرانا ہوگی۔ اس کے بعد کھلاڑیوں کو پہلے دن، تیسرے اور پانچویں دن ہوٹل میں چھ دن کے لازمی قرنطین مدت کے دوران کورونا وائرس کی جانچ کرانا ہوگی۔ ان تینوں جانچ کی رپورٹ منفی ہونے کے بعد ہی کھلاڑیوں کو تربیت کی اجازت ہوگی۔
چنئی کے ان 10 اراکین کی پوزیٹیو رپورٹ کورونا وائرس سے متعلق جانچ کے تیسرے دور میں آئیں۔ ہوٹل کے قرنطین کے پانچویں روز کھلاڑیوں کے تیسرے راؤنڈ کی جانچ کی گئی۔ چنئی نے ہوٹل میں اپنے کھلاڑیوں کی آئسولیشن کی مدت میں توسیع کردی ہے اور ان کی تربیت ملتوی کردی ہے۔ قابل ذکر ہے کہ آئی پی ایل کے لئے ٹیم کے کھلاڑیوں کی تربیت جمعہ سے ہی شروع ہونی تھی۔ سی ایس کے کی ٹیم 21 اگست کو دبئی پہنچی تھی۔
سی ایس کے نے دوبئی پہنچنے سے قبل چنئی میں اپنے کھلاڑیوں کے لئے پانچ دن کی تربیت کا انتظام کیا تھا۔ تربیت میں کپتان مہندر سنگھ دھونی، سریش رینا، دیپک چاہر، امباتی رائیڈو، پیوش چاؤلا، شاردل ٹھاکر اور گیندبازی کوچ لکشمی پتی بالاجی نے شرکت کی تھی۔