مینگلور : جنوبی کینرا میں کورونا وائرس متاثرین کی تعداد ہوگئی 16؛ ایمبولینس کے دونوں ڈرائیوروں کو بھیجاگیا کورنٹائن
منگلورو، 22/اپریل (ایس او نیوز) بنٹوال میں کورونا وائرس سے متاثرہ ایک مریضہ کی موت کے بعد اس کے رابطے میں آنے والے پڑوسی خاتون کی جانچ رپورٹ بھی پوزیٹیو آگئی، جس کے بعد ضلع جنوبی کینرا میں وباء سے متاثرین کی تعداد بڑھ کر 16ہوگئی ہے۔اس وقت 3مریض زیر علاج ہیں جبکہ 12مریضو ں کو صحتیابی کے بعد چھٹی دیدی گئی ہے۔ پتہ چلا ہے کہ جس ایمبولنس پر خاتون کو اسپتال پہنچایا گیا تھا اُس کے دونوں ڈرائیوروں کو کورنٹائن میں بھیجا گیا ہے۔
ضلع ڈپٹی کمشنر سندھو بی روپیش نے بتا یا کہ کورونا سے متاثر ہ خاتون کے اہل خانہ اور پڑوسیوں سمیت 9لوگوں کو کوارنٹین کیا گیا ہے۔اور ضلع انتظامیہ کی جانب سے بنٹوال کے اس علاقے کی کڑی نگرانی کی جارہی ہے، کیونکہ بنٹوال تعلقہ میں ا ب تک تین پوزیٹیو معاملات سامنے آئے ہیں اور اس میں ایک دس ماہ کا بچہ بھی شامل ہے۔
مرنے والی خاتون کے بارے میں معلوم ہوا ہے کہ فروری میں اس کا بیٹا دبئی سے گھر لوٹا تھا سمجھا جارہا ہے کہ یہ انفیکشن بیٹے سے ماں میں منتقل ہوا ہوگا۔ لیکن بیٹے کے اندر کورونا وائرس سے متاثرہونے کی کوئی بھی علامت نظرنہیں آئی تھی۔
اس دوران پتہ چلا ہے کہ موت کا شکار ہونے والی خاتون کو جس 108ایمبولینس میں اسپتال لے جایا گیا تھااس کا معاون لاپتہ ہوگیاتھا جس کی تلاش بنٹوال کے افسران کرہے تھے۔ اب معلوم ہوا ہے کہ وہ اپنے گاؤں ہبلی پہنچ گیا ہے اور خود ہی وہاں پر ایک اسپتال میں کورنٹین میں چلا گیا ہے۔خیال رہے کہ کورونا سے متاثر افراد کو سپتال میں پہنچانے کے لئے 108ایمبولینس کو سرکاری اسپتال کے احاطے میں 24x7تیار رکھا گیا ہے۔مگر اس کے ڈرائیور اور معاون کی رہائش سدلکٹّے میں رہنے کی وجہ سے زیادہ تر یہ ایمبولینس سرکاری اسپتال کے بجائے سدلکٹے میں ہی دکھائی دیتی ہے۔جبکہ ڈرائیور اور معاون کے لئے تحفظ والی پوشاک نہ ہونے کی وجہ سے اب وہ دونوں بھی کورنٹین میں چلے گئے ہیں۔