ملک کی تعمیر کا نگریس کے دورمیں ہی ہوئی: ایم بی پاٹل
بنگلورو،5/ستمبر (ایس او نیوز/ایجنسی)ریاستی وزیر برائے بھاری ودرمیانی صنعت او ر کے پی سی سی پرچار سمیتی کے صدر ایم بی پاٹل نے کہا کہ گزشتہ 75سال میں ہندوستان کو کانگریس پارٹی نے ہی جوڑا نہ کہ نریندر مودی نے۔
حالیہ اسمبلی انتخابات میں کانگریس پارٹی کی جیت کے لئے محنت کرنے والے ریاستی وضلع سطح کے پر چار سمیتیوں کے عہدیداروں کو کے پی سی سی دفتر کے بھارت جوڑو ہال میں منعقد تہنیتی اجلاس اور آنے والے پارلیمانی انتخابات کی تیاریوں کے سلسلہ میں طلب کردہ اجلاس سے خطاب کرتے ہوئے ایم بی پاٹل نے نے کہا کہ ملک کی تعمیرو ترقی میں اہم رول کانگریس نے ادا کیا اسی طرح غریبوں کے ایمپاور منٹ کے لئے غذائی تحفظ اور لازمی تعلیم ایکٹ جاری کرنے کا سہرا کانگریس کے سرجاتا ہے۔
انہوں نے کہا کہ نریندر مودی نے اقتدار پرآنے کے بعد صرف100دنوں میں سوئز بینکوں سے کالا دھن واپس لاکر ملک کے ہر شہری کے بینک کھاتہ میں 15لاکھ روپئے جمع کرنے کا وعدہ کیا تھا لیکن وعدہ کیا ہوا سب جانتے ہیں۔ انہوں نے بتایا کہ ملک کے 95فیصد آبی ذخائر کانگریس کے دور میں تعمیر کئے گئے اس طرح آئی آئی ایم، آئی آئی ٹی، ایمس ودیگر کا قیام بھی کانگریس کے دور میں ہوا اور کانگریس نے کبھی فرقہ واریت کی سیاست نہیں کی۔
اجلاس میں کے پی سی سی کے نائب صدر بی ایل شنکر،رکن کونسل منجوناتھ بھنڈاری، سدھا ما دس، پرکاش راتھوڑ،سابق وزیر کمنے رتنا کر ودیگر حاضر رہے۔
