بھٹکل میں کورونا وائرس کو لے کر کیاسوشیل میڈیا میں کسی طرح کی سازش رچی جارہی ہے ؟ مسلمانوں سے دور رہنے اورکسی بھی طرح کا لین دین نہ رکھنے کے مسیجس وائرل
بھٹکل 7/اپریل (ایس او نیوز) ایسا لگتا ہے کہ کورونا وائرس کی وباء فسطائی اور فرقہ وارانہ ذہنیت والے غیر مسلموں کے لئے مسلمانوں کے خلاف اپنی بھڑاس نکالنے کا نیا ہتھیار بن گئی ہے۔ ایک طرف کورونا وائرس کے نام پر مسلمانوں سے دوری رکھنے کی تلقین کی جارہی ہے اور مسلمانوں سے کسی بھی طرح کی خریداری کرنے کی مخالفت میں کنڑا زبان میں سوشیل میڈیا پر وائس مسیجس وائرل ہورہے ہیں وہیں بعض مقامات پر گاؤں میں مسلمانوں کے داخلے پر پابندی کے پوسٹرس اور بیانرس لگنے کی باتیں سننے اور دیکھنے کو مل رہی ہیں۔کورونا کو لے کر بعض جگہوں پر مسلمانوں پر حملے کی وڈیو کلپ وائرل ہورہی ہے تو وہیں سوشیل میڈیا میں کورونا وائرس کو لے کر کنڑا زبان میں ایسا تاثر دیا جارہا ہے کہ مسلمانوں کے ذریعے ہی کورونا وائرس پھیل رہا ہے، لہٰذا مسلمانوں سے دوریاں بنائی جائیں اور اُن سے کسی طرح کا لین دین نہ رکھیں۔
کنڑا زبان میں وائرل ہونے والے وائس مسیجس میں کہا جارہا ہے کہ اگر کوئی مسلمان بالکل کم قیمت پر بھی کوئی چیز بیچ رہا ہو تو بھی اُن سے خریداری نہ کی جائے، بعض مسیجس میں مسلمانوں کی طرف سے دی جارہی امداد کوبھی قبول نہ کرنے کی تلقین کی جارہی ہے۔کسی نے سوشیل میڈیا میں یہاں تک کہہ ڈالا ہے کہ یہ دراصل کورونا جہاد ہے۔
کچھ شرپسند عناصر مسلمانوں کے خلاف بغض اور دشمنی پھیلانے کے لئے سوشیل میڈیا کا جس ڈھڑلے سے استعمال کررہے ہیں اور قانون کے رکھوالوں کی توجہ اس طرف دلانے کے باوجود بھی وہ ایسے مسیجس پر خاموش نظر آرہے ہیں اس سے تو یہی لگتا ہے کہ ان مسیجس کے پیچھے کوئی بہت بڑا ہاتھ ہے اورکورونا کی آڑ میں ملک بھر میں کوئی بہت بڑی سازش رچی جارہی ہے جس کی وجہ سے انتظامیہ بھی ایسے مسیجس کے خلاف معاملات درج کرنے سے کترا رہے ہیں۔
غلط اور بے بنیاد مسیجس جس تیزی کےساتھ وائرل ہورہے ہیں، اس کے اثرات بھی بالخصوص بھٹکل میں نظر آنے لگے ہیں، معصوم اور غریب عوام ان مسیجس کے جھانسے میں آکر مسلمانوں کے قریب آنے میں خوف کھارہے ہیں، گھروں میں تازہ دودھ سپلائی کرنے والوں نے دودھ سپلائی کرنا بند کردیا ہے۔ ترکاری لے کر جو لوگ گھروں کے پاس آتے ہیں، ترکاری کو ہاتھ میں دینے کے بجائے گھر کے ایک حصے پر رکھ کر ایسے پیچھے ہٹ جاتے ہیں جیسے اُن میں کورونا منتقل ہونے کا خطرہ ہو۔ دکانوں میں کام کرنے والے ملازمین دکانوں میں مسلمانوں کے ساتھ کام کرنے سے پیچھے ہٹ رہے ہیں۔
بھٹکل میں کورونا کو لے کر بعض شرپسند عناصر جس طرح کی فضا بنانے میں مصروف ہیں، اگر اس سلسلے پر فوری قابو نہیں پایا گیا تو اس کے سنگین اثرات رونما ہونے کے امکانات صاف نظر آرہے ہیں۔