کمٹہ میں کورونا کا ایک اور معاملہ؛ اُترکنڑا میں متاثرین کی تعداد پہنچی سو
بھٹکل:12؍جون (ایس اؤ نیوز) کمٹہ تعلقہ میں جمعہ کو ایک اور کورونا پوزیٹیو کیس کی تصدیق ہونے کے بعد ضلع اُترکنڑا میں کورونا معاملات کی تعداد بڑھ کر سو ہوگئی ہے۔
ذرائع سے ملی اطلاع کے مطابق مہاراشٹرا سے آکر کوارنٹائن میں رہنے والے ایک 56سالہ شخص کی رپورٹ آج کورونا پوزیٹیو آئی ہے۔
خیال رہے کہ کورونا کے بالکل ابتداء میں دبئی سے کچھ لوگ بھٹکل پہنچنے پر اترکنڑا ضلع میں صرف بھٹکل ہی ایک مقام تھا جہاں کورونا کے پوزیٹیو معاملات سامنے آرہے تھے۔اس کے بعد قریب 20-22 دنوں بعد منگلورو کے فرسٹ نیرو اسپتال سے علاج کروانے کی وجہ سے بیک وقت 25-30کورونا پوزیٹیو کے معاملات ابل پڑے ۔اور جب بھٹکل کے سبھی متاثرین صحت یاب ہوکر گھر لوٹے تو ضلع کے دیگر تعلقہ جات میں کورونا وباء کی شروعات ہوئی جو ابھی تک جاری ہے۔ فی الحال اترکنڑا ضلع میں بھٹکل ہی ایک ایسامقام ہے جہاں لگتا ہے کہ کورونا پر ایک حد تک قابو پالیا گیا ہے ۔
ضلع انتظامیہ کےکڑے اقدامات ، کڑی نگرانی اور چوکسی کی وجہ سے کورونا کو شروع شروع میں شکست دی گئی ہے لیکن اس کے بعد مہاراشٹرا سمیت دیگر ریاستوں سے آنے والوں میں کورونا کی تصدیق ہونے سے سبھی تعلقہ جات متاثر نظر آرہے ہیں۔
