کاروار 25؍مارچ (ایس او نیوز) ریاستی حکومت کی طرف سے مختلف محکمہ جات میں ٹھیکے کی بنیاد پر منظور شدہ اسامیوں سے زیادہ تعداد میں کی گئی بھرتی کو فور ی طور پر رد کرنے کے احکامات جاری کیے گئے ہیں۔اس کی وجہ سے ٹھیکے کی بنیاد پر ملازمت کررہے سرکاری نوکروں کا معاملہ پھر ایک بار تنازعے کا شکار ہوتا نظرآرہا ہے۔

بجٹ میں رکھی گئی گنجائش اور ہیومن ریسورسس ڈپارٹمنٹ کی جانب سے جاری کردہ رہنمائی کے مطابق سرکاری محکمہ جات میں مختلف خالی عہدوں پر ٹھیکے کی بنیاد پر اسامیوں کو بھرتی کرنے کی اجازت دی گئی تھی۔ پتہ چلا ہے کہ بعض محکمہ جات کی طرف سے ٹھیکے کی بنیاد پر بھرتی کیے گئے عہدوں پرفائز اسامیوں کی ملازمت کی میعاد کو آگے بڑھانے کے لئے فنانس ڈپارٹمنٹ سے منظوری طلب کی گئی تھی۔ اس دوران یہ بات سامنے آئی ہے کہ سرکاری رہنمائی کو نظر انداز کرتے ہوئے خالی عہدوں سے زیادہ اسامیوں کو ٹھیکے کی بنیاد پر ملازمت دی گئی ہے اور اس سے سرکاری بجٹ پر منفی اثر پڑ رہا ہے۔اس کے پیش نظر سرکارکی طرف سے اب یہ احکام جاری کیے گئے ہیں کہ ٹھیکے کی بنیاد پر ملازمت پر رکھے گئے ضرورت سے زیادہ اسامیوں کو فوری طور پر بر طرف کردیا جائے۔ جو اسامیاں خالی ہیں اور سرکاری طور پر بھرتی کے لئے منظور شدہ ہیں صرف انہی عہدوں پر ملازمت کو بحال رکھا جائے یا پھر ٹھیکے کی بنیاد پر ازسرنو بھرتی کی جائے۔