بھٹکل میں کانکریٹ مکسنگ کرنے والی سواری اُلٹ گئی؛ ایک کی موت دوسرا شدید زخمی
بھٹکل 8 ڈسمبر (ایس او نیوز) کانکریٹ مکسنگ کرنے والی سواری اُلٹ جانے کے نتیجے میں ایک شخص کی موت واقع ہوگئی جبکہ ڈرائیور شدید زخمی ہوگیا۔ حادثہ تعلقہ کے کُںٹوانی آروکی نامی مقام پرمنگل دیر رات کو پیش آیا۔ بتایا گیا ہے کہ سڑک کنارے کی ڈھلان پر سواری بے قابو ہوکر اُلٹ گئی تھی۔ مرنے والے کی شناخت بیجاپور کے مُدیبہال کے رہنے والے کرن پوار (21) کی حیثیت سے کی گئی ہے۔
اطلاع کے مطابق کانکریٹ روڈ تعمیر کرنے والی اس سواری پر دو لوگ سوار تھے، سواری اُلٹ جانے کے نتیجے میں کرن پوار کی نعش سواری کے اندرہی بری طرح پھنس گئی تھی فائر بریگیڈ اور پولس عملے نے مقامی لوگوں کی مدد سے نعش کو کافی جدوجہد کے بعد باہر نکالا۔ حادثہ میں ڈرائیور سنیل سریش کے پیروں کو شدید چوٹ لگی ہے جسے بھٹکل سرکاری اسپتال میں ابتدائی طبی امداد فراہم کرنے کے بعد کنداپور روانہ کیا گیا ہے۔
اس موقع پر بھٹکل مضافاتی پولس تھانہ کے پی ایس آئی بھرت نائیک، فائر بریگیڈ کے آفسر کے رمیش، بی جے پی یوامورچہ کے ضلعی جنرل سکریٹری سنتوش نائک سمیت کافی دیگرلوگ موجود تھے۔
