بھٹکل:سرابی ندی کی صفائی کے لئے کوششیں شروع؛ چار اسپورٹس سینٹروں کی مشترکہ میٹنگ؛ تنطیم کے ذریعے کام آگے بڑھانے کا فیصلہ
بھٹکل 4/فروری (ایس او نیوز) مشہورشرابی یا سرابی ندی جو چوتنی، غوثیہ اسٹریٹ، مشما اسٹریٹ، خلیفہ اسٹریٹ ، ڈارنٹا، ڈونگر پلی اور بیلنی سے ہوتے ہوئے بندر پہنچ کر بحرعرب سے ملتی ہے، صدیوں سے اس کی صفائی نہ کئے جانے کو لے کر عوام میں کافی عرصہ سے تشویش پائی جارہی تھی، مگر اب کوسموس اسپورٹس سینٹر ، سن شائین اسپورٹس سینٹر ، مون اسٹار اسپورٹس سینٹر اور لائن اسپورٹس سینٹر کے ذمہ داران نے اس ندی کو صاف کرنے کا بیڑا اُٹھایا ہے اور اس تعلق سے قومی سماجی ادارہ مجلس اصلاح و تنظیم سے رُجوع ہونے اور اگلی کاروائی انجام دینے کا فیصلہ کیا ہے۔
ڈارنٹاندی کے کنارے واقع کوسموس اسپورٹس سینٹر میں اس تعلق سے ایک اہم میٹنگ کا انعقاد کیا گیا جس میں ندی کے اطراف کے چاروں اسپورٹس سینٹروں کے ذمہ داران شریک ہوئے۔ تاریخی سرابی ندی جہاں سے عرب کےقافلے بھٹکل اُترے تھے اور بھٹکل سمیت ساحلی علاقوں میں اسلام کی روشنی پھیلائی تھی، آج یہ ندی کیچڑ اور مٹی سے بھرگئی ہے اور ڈرینیج کا گنداپانی چھوڑے جانے کے بعدسے ندی اتنی گندی ہوگئی ہے کہ نشیبی محلوں کے صاف ستھرے کنووں کو آلودہ کرنے کا سبب بنتی جارہی ہے۔ندی میں مٹی اور کیچڑ اتنا زیادہ بھر گیا ہے کہ ندی میں پانی نظر نہیں آتا صرف گندہ پانی بہتا ہوا نظر آتا ہے۔ اس تعلق سے میٹنگ میں سنجیدگی سے غور کیا گیا اور اس کی صفائی کو لے کر ضلع اُترکنڑا انچارج وزیر منکال وئیدیا سمیت ڈپٹی کمشنر، اسسٹنٹ کمشنر اور محکمہ آبپاشی سے رابطہ کرنے اورتماموں کو میمورنڈم پیش کرکے صفائی کا کام شروع کرنے کے لئے مہلت دینے پر غور کیا گیا، ضرورت پڑنے پر پُرامن احتجاج کرنے کی طرف بھی غور کیا گیا۔
ندی کو صاف کرنے کے لئے چاروں اسپورٹس سینٹروں کے ذمہ داران نے اپنی اپنی جانب سے ہر ممکن تعاون کی پیش کش کی ، البتہ اس بات کا فیصلہ کیا گیا کہ پہلے قومی سماجی ادارہ مجلس اصلاح و تنطیم سے رُجوع ہوکر تنؓظیم کی طرف سے اس تعلق سے کس طرح کے اقدامات کئے جارہے ہیں اُس کا تفصیلی جائزہ لیاجائے اور اس بات کی کوشش کی جائے کہ تنظیم کی سرپرستی میں ہی کام کو آگے بڑھایا جاسکے ۔ اس ضمن میں فیصلہ لیا گیا کہ پہلے تنظیم کے ذمہ داران سے وقت لیا جائے اور خصوصی ملاقات کے بعد ہی اگلا لائحہ عمل تیار کیا جائے ۔
کوسموس اسپورٹس سینٹر کے جنرل سکریٹری مولوی اسماعیل انجم گنگاولی ندوی نے میٹنگ کی نظامت کی، سن شائین اسپورٹس سینٹر کے جنرل سکریٹری اور بھٹکل میونسپل کونسل کے سابق جنرل سکریٹری قیصر محتشم، سابق کونسلر کے ایم اشفاق، مولوی تیمور گوائی ندوی، اقبال سدی باپا، شمعون حاجی فقیہ سمیت کافی ذمہ داران موجود تھے۔کوسموس کے صدر مولوی ارشاد نائطے ندوی نے ابتدائی کلمات اور میٹنگ کی غرض و غایت کے ساتھ میٹنگ کی صدارت کی۔