بھٹکل 20 جولائی (ایس او نیوز)  گھاس چرنے کےلئے چھوڑی گئی گائے کو ذبح کرکے گوشت چوری کرنے کی کوشش کے دوران  گائے  کے مالک کو  آتا دیکھ کر  ملزم اسکوٹر پر سوار ہوکر فرار ہونے کی واردات ساگر روڈ   سے آگے   ماروکیری۔ کوٹاکھنڈ کراس کے قریب  منگل کی شام کو پیش آئی ہے۔

بھٹکل تعلقہ  کے ماروکیری کوٹا کھنڈ کے رہنے والے سُکرا سنّو گونڈا کے مطابق  شام تک جب اُس کی ایک گائے گھر واپس نہیں لوٹی تو اُسے  وہ  جنگل میں تلاش کرنے کےلئے نکل پڑا، اس دوران اس نے دیکھا کہ  درختوں اور جھاڑیوں کے درمیان  گائے کا چمڑا    کاٹا جارہا ہے، جیسے ہی سُکرا گونڈا آگے بڑھا  دو لوگ  کاٹےہوئے جانور  کو اُدھر ہی چھوڑ کر سڑک کنارے پہلے سے  موجود اسکوٹر (اسکوٹی)   پر سوار ہوکر  بھاگ نکلے۔ سُکرا گونڈا کا کہنا ہے کہ  جب وہ  اسکوٹر پر بھاگ رہے تھے تو اس نے کافی چینخ و پکار کی اور اُنہیں روکنے کی کوشش کی مگر  وہ فرار ہونے میں کامیاب ہوگئے۔

سُکرا گونڈا کا کہنا ہے کہ   ذبح شدہ گائے نے  ڈیڑھ ماہ قبل ہی  تیسرے بچھڑے کو جنم دیا تھا، باقی جانور شام کا اندھیرا پھیلتے ہی گھر پہنچ گئے تھے، مگر یہی ایک گائے نہیں آئی تھی جس کو تلاش کرتےہوئے وہ  اس طرف  آیا تھا، جس کے دوران چور گائے کا سر اور گوشت کو جنگل میں ہی چھوڑ کر  فرار ہوگئے ۔

گائے کو کاٹنے کی اطلاع ملتےہی  ماروکیری کوٹا کھنڈ اور اطراف کے لوگ جائے وقوع پرپہنچے اور واقعے پر سخت ناراضگی کا اظہار کیا۔ ماروکیری گرام پنچایت صدر ماستی گونڈا، مقامی لیڈران ایم ڈی نائک و دیگربھی جائے  واردات پر پہنچ گئے اور  ملزموں کا جلد سے جلد پتہ لگانے اور اُنہیں گرفتار کرنے کا مطالبہ کرنے لگے۔

واقعے کی اطلاع ملتے ہی  سرکل پولس انسپکٹر دیواکر، پی ایس آئی سُوما، ہنومنت کوڈ گُنٹی ، مضافاتی پی ایس آئی بھرت  اور دیگر اہلکار بھی جائے وقوع پر پہنچ گئے  اور واردات کے تعلق سے گائے کے مالک سُکرا گونڈا سے معلومات حاصل کی۔ اس دوران  جانوروں کے ڈاکٹر  وویکانند ہیگڈے کو بھی  جائے واردات پر طلب کیا گیا اور کاٹی گئی گائے کا  پنچ نامہ کرایا گیا۔

واقعے کے تعلق سے گفتگو کرتےہوئے سرکل پولس انسپکٹر دیواکر نے  عوام کو یقین دلایا کہ  جن لوگوں نے بھی یہ واردات انجام دی ہے، پولس جلد سے جلد اُن کا پتہ لگاکر اُنہیں حوالات میں بند کردے گی۔