کمٹہ میں کار اور لاری کی ٹکر : ایک ہلاک 8زخمی
کمٹہ:8؍اکتوبر(ایس اؤ نیوز) لاری اور کار کے درمیان ہوئی ٹکر میں جائے وقوع پر ہی ایک خاتون ہلاک ہوگئی جبکہ آٹھ دیگر زخمی ہوگئے۔ حادثہ منگل کو کمٹہ شہر کے پانڈورنگا ہوٹل کے سامنے نیشنل ہائی وے 66 پر پیش آیا۔
ذرائع سے ملی اطلاع کے مطابق کار پر سوار سبھی افراد کا تعلق پڑوسی ریاست کیرالہ سے ہے۔ بتایا گیا ہے کہ کار کاروار سے کیرالہ کی طرف جارہی تھی جب مخالف سمت سے آنے والی لاری کے ساتھ ٹکر ہوگئی۔
کمٹہ میں سہولیات سے آراستہ اسپتال نہ ہونے کی وجہ سے زخمیوں کوعلاج کے لئے اُڈپی کے نجی اسپتال روانہ کیاگیا ہے۔ موصولہ اطلاع کے مطابق لاری ڈرائیور حادثے کے بعد فرار ہوگیا ہے۔ حادثے میں انواکار کو شدید نقصان پہنچا ہے اور کار کے سامنے کا حصہ چکناچورہوگیاہے۔
حادثے کی اطلاع ملتے ہی کمٹہ سی پی آئی پرمیشور گنگا اور پی ایس آئی سنپت ای سی اپنے عملے کے ساتھ جائے وقوع پر پہنچ گئے اور معائنہ کرنے کے بعد کیس درج کرلیا ۔