منگلورو: کیمپس فرنٹ آف انڈیا نے کیا وکالت کے طلباء کے لئے شہید نوشاد قاسمجی کے تعلق سے خطاب کا اہتمام
منگلورو10؍اپریل (ایس او نیوز) کیمپس فرنٹ آف انڈیاشاخ کرناٹکا کی طرف سے ’ناانصافی کی دَہائی‘ کے عنوان سے ایک پروگرام منعقد کیا گیا جس میں شہید نوشاد قاسمجی کے تعلق سے وکالت کی تعلیم پارہے طلباء سے خطاب کیا گیا۔
منگلورو کے سہودیا سبھا بھون میں اس پروگرام کا انعقاد ہوا، جس میں نوشاد قاسمجی شہید کی اہلیہ ایڈوکیٹ نصرت نے مہمان خصوصی کی حیثیت سے شرکت کی۔محترمہ نصرت نے مرحوم نوشاد کی زندگی اور قانون کے میدان میں ان کی جدوجہد کے تعلق سے تفصیلی گفتگو کی ۔ساتھ ہی ان کے قتل کے تعلق سے تحقیقات میں پولیس کو جوناکامی ہوئی ہے اس پر بھی تفصیل سے روشنی ڈالی۔محترمہ نصرت نے کہا کہ مرحوم نوشاد ایک ایڈوکیٹ کی حیثیت سے اپنے مؤکلوں کے درمیان کسی قسم کی تفریق اور امتیاز نہیں کرتے تھے اور ہمیشہ اس بات کا خیال رکھتے تھے کہ ان کے ہر ایک مؤکل کو بھرپور انصاف ملے۔ان کی زندگی اورسوچ ہم سب کے لئے ایک رول ماڈل کی حیثیت رکھتی ہے۔
کیمپس فرنٹ کے ریاستی صدر فیاض ڈوڈمنے نے خطاب کرتے ہوئے کہا کہ قانون اور انصاف کی راہ میں جد وجہد کرنے والوں کوشہید نوشاد کی طرح حق و صداقت اور عدل کے ساتھ بلند اخلاق و کردار کا مظاہرہ کرنا چاہیے۔ اس موقع پر کیمپس فرنٹ آف انڈیا کی طرف سے’’جملہ ری پبلک کے نام سے ترتیب دیا گیا ایک دستاویز شمارہ نوشاد مرحوم کی اہلیہ ایڈوکیٹ نصرت کی خدمت میں پیش کیا گیا۔اس پروگرام کی نظامت تاج الدین نے کی۔