برہماور،8؍ نومبر (ایس او نیوز) بے روزگاری سے پریشان اور مایوس نوجوان نے سالی گرام میں واقع مندر کے تالاب میں کود کر خودکشی کرلی ۔

مہلوک نوجوان کا نام سنیل موگویرا (18 سال) بتایا جاتا ہے جو کہ اڈپی ضلع کے پانڈیشور ایڈابیٹو کا رہنے والا تھا ۔ موصولہ رپورٹ کے مطابق سنیل نے پہلے گرونرسمہا مندر کے اندر جا کر مورتی کے آگے سر جھکایا اور پھر باہر آ کر تالاب کے کنارے لگی ہوئی لوہے کی باڑھ پھلانگتے ہوئے تالاب میں کود پڑا ۔ موقع پر موجود لوگوں نے اس کی جان بچانے کی کوشش کی مگر وہ اس میں کامیاب نہیں ہوئے ۔

سنیل کے بارے میں پتہ چلا ہے کہ وہ قلی مزدوری کیا کرتا تھا مگر پچھلے کچھ دنوں سے کام دھندا نہ ہونے کی وجہ سے وہ سخت ذہنی الجھن اور تناو سے گزر رہا تھا ۔

کوٹا پولیس اسٹیشن کے عملہ نے جائے واردات پر پہنچ کر معائنہ کیا اور کیس درج کرلینے کے بعد تحقیقات شروع کردی۔