بھٹکل25 / مارچ (ایس او نیوز) اس مرتبہ پارلیمانی انتخابات کے پس منظر میں جو سیاسی تبدیلیاں نظر آ رہی ہیں اس کے پردے سے ایک نئی بات ابھر کر سامنے آ رہی ہے کہ بی جے پی نے اگلے ریاستی اسمبلی انتخابات میں نوجوان لیڈروں کو آگے بڑھانے اور پارٹی کے مستقبل کو مستحکم کرنے کے لئے کٹر ہندوتوا وادی لیڈروں کی ایک ٹولی تشکیل دی ہے جس میں اتر کنڑا کے ایم پی اننت کمار ہیگڑے، میسورو کے پرتاپ سنہا، چکمگلورو کے نلین کمار کٹیل اور دکشن کنڑا کے سی ٹی روی کو شامل کیا گیا ہے ۔ 

بی جے پی کے ایک لیڈر نے بتایا کہ اسی  ٹولی  کی  قیادت میں  ریاستی اسمبلی الیکشن    جیتنے کی حکمت عملی تیار کی جارہی ہے، اور یہی وجہ ہے کہ بی جے پی نے ریاستی سیاست میں اس کٹرہندوتوا وادی ٹولے کو سرگرم رکھنے اور پارٹی نوجوان لیڈر شپ کو آگے بڑھانے کے مقصد سے ایک طرف انہیں پارلیمانی ٹکٹ سے دور رکھا ہے تو دوسری طرف  بسو راج بومئی، وشویشور ہیگڑے کاگیری جیسے پارٹی کے سینئر لیڈروں کو  اسمبلی سے اُٹھاکر پارلیمانی سیاست میں لے جانے کا منصوبہ بنایا ہے ۔

بی جے پی کے متعلقہ لیڈر کے مطابق  وزیر اعظم نریندر مودی آنے والے دنوں میں سیاست سے ریٹائر ہو جائیں گے، مگر وہ  چاہتے ہیں کہ  پارٹی کے مستقبل کے لیے بہتر  یہی ہو گا  کہ نوجوان قیادت کا  کوئی نیا  چہرہ  سامنے لایا  جائے۔ اور  نوجوانوں کو بااختیار بنا کر پارٹی کو منظم کیا جائے ۔