بھٹکل اِسنیہا خصوصی اسکول کے طالب علم عُکاشہ موٹیا نے قومی سطح کے ویٹ لفٹنگ مقابلے میں جیتا چاندی کا تمغہ
بھٹکل 2 مارچ (ایس او نیوز) بھٹکل کے اسنیہا خصوصی اسکول میں زیر تعلیم عُکاشہ موٹیا نے اُترپردیش کے شہر کانپور میں منعقدہ ذہنی طور پر معذور بچوں کے نیشنل لیول ویٹ لفٹنگ مقابلے میں شاندار کارکردگی کا مظاہرہ پیش کرتے ہوئے دوسرا مقام حاصل کیا اورچاندی کے تمغہ حاصل کرنے کے ساتھ ساتھ اپنے اسکول کے اور پورے شہر بھٹکل سمیت ہ ریاست کرناٹک کا بھی نام روشن کردیا۔ کامیابی سے ہمکنار جب عُکاشہ بھٹکل پہنچا ے تو نورمسجد کے باہر ان کا پرجوش استقبال کیا گیا ۔ ایک طرف ذمہ داران نے پھولوں کی مالائیں پہناتے ہوئے اور شال اوڑھاتے ہوئے انہیں مبارکباد پیش کیں تو وہیں کئی نوجوانوں نے مینگلور سے بھٹکل کی سرحد پر داخل ہوتے ہی موگلی ہونڈا سے بائک ریلی کے ذریعے ان کا خیرمقدم کیا۔
نورجامع مسجد کے باہر جب عُکاشہ کی کار رُکی تو قومی سماجی ادارہ مجلس اصلاح و تنظیم کے صدر عنایت اللہ شاہ بندری نے ان کی شال پوشی کرتے ہوئے مبارکباد پیش کی، جبکہ ان کے والد جناب نعیم موٹیا نے پھولوں کا ہار پہناتے ہوئے اپنے فرزند کی کامیابی پر اللہ تعالیٰ کا شکر بجالایا۔اسنیہا خصوصی اسکول کے استاد مسٹر روی نے بھی اس موقع پر عُکاشہ کو پھولوں کا ہار پہناتے ہوئے عکاشہ اور اس کے والد سمیت عُکاشہ کے دوستوں اور رشتہ داروں کو مبارکباد پیش کی۔
بتاتے چلیں کہ حال ہی میں منڈیا میں منعقدہ خصوصی ویٹ لفٹنگ مقابلے میں عُکاشہ نے ویٹ لفٹنگ میں بہترین مظاہرہ پیش کیا تھا جس کے بعد وہ نیشنل لیول کے لئے کولیفائی کرگیا تھا، اس کے ساتھ ہی 26 سے 28 فروری کو اُترپردیش کے کانپور میں منعقدہ نیشنل لیول ویٹ لفٹنگ مقابلے میں عُکاشہ کو ریاست کرناٹک کی نمائندگی کرنے کا موقع ملا اور اس نے پھر ایک بار شاندار پرفارمینس پیش کرتے ہوئے سلور میڈل جیت کر پورے شہر کا نام روشن کردیا۔
پتہ چلا ہے کہ 26 سے 28 فروری کو کانپور میں منعقدہ ذہنی طور پر معذور بچوں کے ویٹ لفٹنگ مقابلوں میں 23 ریاستوں کے 180 کھلاڑی شریک ہوئے تھے اور یہ مقابلے اسپیشل اولمپکس بھارت کے زیراہتمام منعقد ہوئے تھے ۔
بتایا گیا ہے کہ اسپیشل اولمپکس بھارت کھیلوں کا ایک قومی فیڈریشن ہے، جو انڈین ٹرسٹ ایکٹ 1882 کے تحت رجسٹرڈ ہے اور اسے اسپیشل اولمپکس انٹرنیشنل نے تسلیم کیا ہے۔ یہ فیڈریشن منسٹری آف یوتھ افئیرس ( وزارت برائے نوجوانوں کے امور اور کھیل ) سے بھی تسلیم شدہ ہے اور حکومت ہند نے اسے ذہنی طور پر معذور بچوں کے کھیلوں کی ترقی کے لیے ترجیحی زمرے میں رکھا ہے۔
عُکاشہ کی بھٹکل آمد کے موقع پر لائن اسپورٹس سینٹر کے کئی اراکین بالخصوص ارشاد صدیقہ، فیاض مُلآ، تنویر موٹیا، ابوبکر گوائی وغیرہ کے ساتھ دیگر اسپورٹس سینٹروں کے بھی کئی نوجوان موجود تھے۔
نیشنل لیول کے لئے منتخب ہونے پر ساحل آن لائن کی خصوصی وڈیو رپورٹ: