بھٹکل 9/ستمبر (ایس او نیوز) گذشتہ ماہ جالی میں ایک غریب خاتون مہرالنساء کا مکان موسلادھار بارش کے نتیجے میں منہدم ہوگیا تھا اور اُس کا کوئی پرسان حال نہ تھا، جس کو دیکھتے ہوئے بھٹکل مدینہ کالونی، محی الدین اسٹریٹ کا ایک فعال اور سرگرم ادارہ ینگ اسٹار ویلفئیر آرگنائزیشن نے خاتون کو سہارا فراہم کیا ہے۔ ادارہ کے جنرل سکریٹری جناب ظہیر شیخ نے بتایا کہ ینگ اسٹار کی جانب سے گھر کی چھت کی مرمت کی گئی ہے اور قریب 50 ہزار مالیت کا شیڈ ڈال کر چھت کو درست کیا گیا ہے، انہوں نے بتایا کہ خاتون ایک ماہ سے مکان کی مرمت نہ ہونے کو لے کر بے حد پریشان تھی، اور موسلادھار بارش کے چلتے گھر میں ر ہنا ممکن نہیں تھا۔ مگر اب ہم نے چھت کو درست کرتے ہوئے بارش کے پانی کو اندر داخل ہونے سے روک دیا ہے۔
اس تعلق سے ینگ اسٹار کی جانب سے ایک دُعائیہ تقریب کا انعقاد کیا گیا تھا جس میں بھٹکل مسلم یوتھ فیڈریشن کے صدر امتیاز اُدیاور، جنرل سکریٹری نصیف خلیفہ، جالی پنچایت کے سابق صدر آدم پنمبور، سماجی کارکن مُنیر احمدسمیت ینگ اسٹار کے صدر مولانا کبیر، نائب صدر حافظ رفیق و دیگر ذمہ داران سُہیل کددری، اظہر، عاکف گوائی و دیگر کافی لوگ موجود تھے۔
متاثرہ خاتون نے اس موقع پر ینگ اسٹار کے نوجوانوں کا شکریہ ادا کیا اور اُن کے لئے ڈھیر ساری دُعائیں بھی دیں۔