بھٹکل:18؍فروری (ایس او نیوز) تعلقہ میں سمندری سیپی کے کھانے سے بیمار ہونےکا سلسلہ جاری رہنے سے عوام خوف و ہراس  میں مبتلا ہیں۔ اتوار کو تعلقہ میں 100سے زائد لوگ سیپی کھانے سے پھر بیمار ہو کر اسپتال میں داخل ہونے کا  واقعہ پیش آیا ہے۔

تعلقہ کے منکولی  میں  درگی نائک، تمو نائک، آشا نائک، کارگدے میں سویتا نائک، گوری نائک، لکشمی نائک، شرالی کے الویکوڑی میں درگپا نامی افراد بھٹکل سرکاری اسپتال میں زیر علاج ہیں تو بقیہ شرالی کے سرکاری اور پرائیویٹ اسپتالوں میں اسی طرح مرڈیشور کے بستی میں بھی کئی لوگ پرائیویٹ اسپتالوں  میں داخل ہونے کی اطلاعات ملی ہیں۔

بتایا گیا ہے کہ سیپی کا سالن کھانے کے بعد شام ہونے تک ہر کوئی قئے کرنے لگا، جس کے بعد ایک ساتھ کافی لوگ  اسپتالوں کا رخ کرنے سے تعلقہ بھر میں خوف وہراس کی لہر دو ڑگئی۔ بیماری کی اطلاع پاتے ہی بھٹکل تحصیلدار وی این باڈکر نے سرکاری اسپتال پہنچ کر بیمار زدہ لوگوں کی صحت کی جانکاری حاصل کی۔ اس موقع پر انہوں نے بات کرتے ہوئے کہاکہ سیپی کا سالن کھانے سے پیدا ہونے والے حالات کو دیکھتے ہوئے فی الحال سیپی کی فروخت کاری کو روکنے کے لئے اقدامات اٹھائے جائیں گے۔

گزشتہ ایک ہفتہ سے سمندری سیپی کا سالن کھا کر سینکڑوں لوگ بیمار ہوکر اسپتال میں زیر علاج رہنے کے دوران  اتوار کی صبح باہر سے قریب 70تھیلے سمندری سیپی بھٹکل کی مچھلی مارکیٹ پہنچنے کی ذرائع نے خبر دی ہے۔ یہ سیپیاں سے کہاں سے آئی ہیں ابھی تک یہ راز میں ہے ، افسران جانچ میں لگے ہوئے ہیں ، اس موقع پر میڈیکل آفسر نے نے عوام الناس سے اپیل کی ہے کہ صحت عامہ کے پیش نظر اگلے کچھ دنوں تک  عوام سیپیاں نہ کھائیں۔