انکولہ میں ہوئے سڑک حادثہ میں ایک نوجوان جاں بحق؛ دو زخمی؛ ایس ایس ایل سی امتحان دینے کاروار جانے کے دوران پیش آیا حادثہ
بھٹکل 21/مارچ (ایس او نیوز) ایس ایس ایل سی امتحان دینے کاروار جانے کے دوران بھٹکل کی ایک کار انکولہ کے قریب نیشنل ہائی وے پر حادثے کا شکار ہوگئی جس کے نتیجے میں کار پر سوار ایک نوجوان جاں بحق ہوگیا جبکہ دیگر دو کو معمولی چوٹیں آئی ہیں۔
حادثہ کمٹہ سے 25 کلو میٹر دور شیرور نیشنل ہائی وے پر آج جمعرات صبح قریب 7:30 بجے پیش آیا۔ مرنے والے طالب العلم کی شناخت بھٹکل قاضیا اسٹریٹ کے مولوی حافظ جلال الدین محمد شماس گولٹے (21) کی حیثیت سے کی گئی ہے۔ جامعہ اسلامیہ سے حافظ ہونے کے ساتھ ساتھ عالمیت بھی مکمل کرنے کے بعد وہ پرائیویٹ طور پر ایس ایس ایل سی امتحان دینے اپنے دیگر ساتھیوں کے ساتھ کار پر سوار کاروار امتحان سینٹر جارہا تھا۔ جناب اعجاز گولٹے کا اکلوتا فرزند مولوی شماس بھٹکل مشما مسجد میں امامت کے فرائض بھی انجام دے رہا تھا۔
موقع واردات پر موجود بعض عینی شاہدین کے مطابق کار متعلقہ مقام پر سڑک کنارے مٹی کے پہاڑ سے ٹکراتے ہوئے پلٹی کھا گئی تھی، جس کے نتیجے میں کار کی پچھلی سیٹ پر سوار حافظ شماس کا سر غالباً کسی چیز سے ٹکراگیا اور وہ موقع پر ہی جاں بحق ہوگیا۔ انا للہ و انا الیہ راجعون۔
کار پر سوار دیگر چار میں سے دو لوگوں کو چوٹیں آئی ہیں جن کی شناخت احمد اِیادابن مولوی ایس ایم ہاشم ندوی اور اسماعیل برماور ابن مرحوم مولانا اقبال برماورندوی کی حیثیت سے کی گئی ہے جنہیں انکولہ اسپتال لے جایا گیا ہے۔
پرائیویٹ طور پر ایس ایس ایل سی امتحان دینے بھٹکل سے 50 سے زائد طلبا کاروار روانہ ہوئے ہیں، حادثہ کے فوری بعد موقع واردات پر پہنچے عفان بافقی نے ساحل آن لائن کو حادثہ کی اطلاع دیتے ہوئے بتایا کہ انہیں فوری مدد کی ضرورت ہے۔
حادثے کی اطلاع ملتے ہی مجلس اصلاح و تنظیم کے نائب صدر عنایت اللہ شاہ بندری نے انکولہ اور کمٹہ میں موجود سماجی کارکنان سے رابطہ کرتے ہوئے اُنہیں بھٹکلی نوجوانوں کی مدد کے لئے فوری طور پر روانہ کیا، اسی طرح بھٹکل مسلم یوتھ فیڈریشن کے صدر امتیاز اُدیاور کی قیادت میں محمد نصیف خلیفہ، رئیس رکن الدین سمیت سن شائین اسپورٹس سینٹر کے بھی کافی نوجوان خبر ملتے ہی انکولہ کے لئے روانہ ہوگئے۔ انکولہ اور قریبی علاقوں کے سماجی کارکنان محمد رضوان، سید امتیاز، منظر حُسین ، شکیل شیخ، نواز شیخ، عمران مُلا، ابراہیم و دیگر کافی لوگ فوری طور پر جائے وقوع پر پہنچے پھر سرکاری اسپتال پہنچ کربھی مکمل تعاون فراہم کیا۔
کار پر مزید دو لوگ سوار تھے جن کی شناخت احمد مواد ابن شاکر ماواڑ اور شہباز احمد سدی باپا کی حیثیت سے کی گئی ہے۔ ان میں سے شہباز جسے معمولی چوٹیں آئی تھی، امتحان دینے کاروار امتحان گاہ روانہ ہوگیا ہے۔
مرحوم مولوی شماس کی میت انکولہ سرکاری اسپتال سے پوسٹ مارٹم کے بعد بھٹکل لائی، بعد نماز عصر جامع مسجد میں نماز جنازہ ادا کرنے کے بعد پرانے قبرستان میں تدفین عمل میں آئی۔ اس موقع پر ہزاروں لوگ جنازے میں شریک تھے۔
انکولہ پولس تھانہ میں معاملہ درج کیا گیا ہے۔
