کورونا وباء سے لڑنے آج ریاست گیر سطح پرمنایا گیا ماسک ڈے، بھٹکل میں بھی نکالی گئی عوامی بیداری کی ریلی
بھٹکل18/جون (ایس او نیوز) کورونا سے لڑنے اور عوام میں کورونا سے بچنے کی تدابیر کے تعلق سے بیداری پیدا کرنے آج جمعرات کو ریاست گیر سطح پر ماسک ڈے منایا گیا جس میں وزیراعلیٰ یڈی یورپا نے بنگلور ودھان سودھا سے کبن پارک تک عوامی بیداری ریلی نکالی اور کورونا سے محفوظ رہنے ماسک پہننے پر زور دیا۔
ریاستی حکومت کی ہدایت پر آج بھٹکل میں بھی ماسک ڈے منایا گیا اور ایک طرف جالی پٹن پنچایت میں عوامی بیداری ریلی کا انعقاد کیا گیا وہیں ٹاون میونسپالٹی کی جانب سے بھی ماسک ڈے کا پروگرام منعقد کیا گیا۔
ضلع اُترکنڑا کے کاروار میں ایک طرف ڈپٹی کمشنر ڈاکٹر ہریش کمار نے ماسک ڈے ریلی کو گرین سگنل دیا اور عوام کو ماسک پہننے پر زور دیا تو وہیں جالی پٹن پنچایت کے چیف آفسر وینو گوپال شاستری کی قیادت میں مدینہ کالونی محی الدین اسٹریٹ میں ریلی کا انعقاد کیا گیا۔
اس موقع پر مائک کے ذریعے عوام کو ہدایات دی گئیں کہ وہ کورونا سے محفوظ رہنے کے لئے ماسک کا استعمال کریں، سوشیل ڈسٹنسنگ کا پاس و لحاظ رکھیں اور اپنے ہاتھوں کو بار بار دھوتے رہیں۔ مائک پر کنڑا اور اُردو میں اس بات کابھی اعلان کیا گیا کہ ماسک نہ پہننے پر پہلی بار پکڑے جانے پر سو روپیہ اور دوسری مرتبہ بغیر ماسک پہننے پر دو سو روپیہ، اسی طرح سوشل ڈسٹنسنگ کا پالن نہ کرنے پر پہلی مرتبہ 500 روپیہ اور دوسری مرتبہ پکڑے جانے پر ایک ہزار روپیہ جرمانہ عائد کیا جائے گا۔
اخبارنویسوں سے گفتگو کرتے ہوئے جالی پنچایت کے چیف آفسر وینوگوپال شاستری نے بتایا کہ بھٹکل میں کوویڈ۔19 پر ایک حد تک قابو پانے میں بھٹکل کے عوام نے انتظامیہ کو مکمل تعاون فراہم کیا ہے، ہمیں اُمید ہے کہ عوام آئندہ بھی تعاون کریں گے۔ انہوں نے کہا کہ آنے والے دن مزید کٹھن ہیں لیکن عوام اگر کورونا وباء پر قابو پانے کے لئے ضروری ہدایات پر عمل کریں تو کورونا سے لڑنا ممکن ہے۔
جالی پٹن پنچایت کی طرف سے باقاعدہ عوامی بیداری ریلی نکال کر عوام کو تاکید کی گئی کہ وہ چہرے پر ماسک پہن کرہی باہر نکلیں، اُدھر بھٹکل تحصیلدار دفتر اور میونسپالٹی میں بھی ماسک ڈے منائے جانے کی خبر ملی ہے۔ ضلع اُتر کنڑا سمیت پڑوسی اضلاع اُڈپی اور دکشن کنڑا میں بھی ماسک ڈے کے موقع پر عوامی بیداری کے مختلف پروگرام منعقد کئے گئے۔
