ممبئی 26/اکتوبر (ایس او نیوز) انجمن حامئی مسلمین بھٹکل کے ذمہ داران کی ممبئی آمد پر بھٹکل مسلم جماعت ممبئی نے ایک استقبالیہ جلسہ کا انعقاد کیا جس میں انجمن کے ذمہ داران نے اپنی آمد کا مقصد بیان کرتے ہوئے جماعت کے ممبران سے تعاون کی درخواست کی۔
انجمن کے صدر جناب عبدالرحیم جوکاکو نے انجمن حامئی مسلمین کا تعارف پیش کرتے ہوئے قوم و ملت کو دی جانے والی تعلیمی خدمات پر تفصیلی رپورٹ پیش کی اور بتایا کہ کس طرح آج انجمن کے طلبا تعلیمی میدان میں قوم و ملت کا نام روشن کررہے ہیں۔ انہوں نے بتایا کہ انجمن کالج سے فارغ طلبا مختلف میدانوں میں یونیورسٹی بلیو کا خطاب حاصل کررہے ہیں، ہر سال طالبات یونیورسٹی رینک لے رہی ہیں، امسال بھی انجمن ویمن کالج کی طالبہ پوری یونیورسٹی میں اول رینک حاصل کرچکی ہے۔ انہوں نے بتایا کہ انجمن انجینرنگ کالج کا ایک طالب العلم 14 گولڈ میڈل حاصل کرکے کرناٹک میں ریکارڈ قائم کرچکا ہے۔ اس موقع پرانجمن وفد میں شامل جناب محی الدین رکن الدین ، جناب ایس جے سید ہاشم اور جناب عبدالسمیع کولا نے بھی انجمن کی خدمات پر اپنے اپنے تاثرات پیش کئے اور تمام اراکین جماعت سے انجمن سے جڑے رہنے اور انجمن کو مضبوط کرنے اپنی جانب سے ہرممکن تعاون دینے کی درخواست کی ساتھ ساتھ بھٹکل قیام کےدوران انجمن میں حاضری دینے کی بھی درخواست کی۔
جلسہ میں ممبران کے لئے سوالات کا بھی موقع فراہم کیا گیا تھا جس کے اطمینان بخش جوابات دئے گئے۔
جلسہ کی شروعات مولوی عبدالمغیث کیپا ندوی کی تلاوت سے ہوئی، شکیل کھروری صاحب نے اپنی مترنم آواز میں نعت پاک پیش کی، بھٹکل مسلم جماعت ممبئی کے جنرل سیکرٹری جناب قمر موٹیا نے مہمانوں کا استقبال کیا، بعد میں مہمانوں کی گل پوشی بھی کی گئی، مولوی علی رضا یس یم کی دعا پر جلسہ اختتام کو پہنچا۔