بھٹکل:18؍ اکتوبر(ایس اؤ نیوز)باگلکوٹ ضلع کے مہالنگپور نامی صنعتی و کسانوں کے شہر میں گوٹس فارم مالکان کےلئے منعقدہ گوٹس فارم ماڈرن ٹکنک ورکشاپ میں کورونا لاک ڈاؤ ن میں ریاست بھر کے گوٹس فارم مالکان کی پریشانی اور تکالیف کو دور کرتے ہوئے انہیں دوبارہ پیشے سے وابستہ کرنےمیں مدد اور رہنما ئی کرنے والے بھٹکل کے موٹیا گوٹس فارم کے مالک محمدارسلان محمد انصار موٹیا کی شال پوشی کرتےہوئے تہنیت کی گئی۔
باگلکوٹ کے ایک باغ میں ملن گوٹس فارم ، سداشیوگوٹس فارم اور موٹیا گوٹس فارم بھٹکل کے اشتراک سے اس ورکشاپ کا انعقاد کیاگیا تھا۔ ریاستی وزیر برائے آب پاشی گووند کارجول نے گوٹس فارم ورکشاپ کا افتتاح کیا۔ باگلکوٹ حلقہ کے رکن پارلیمان پی سی گدی گوڈر نے بھی اپنے خیالات کااظہارکیا۔ تیردال حلقہ کے رکن اسمبلی سدو سودی نے صدارت کی۔ ملن گوٹس فارم کے مالک بخشی صاحب یادواڑ نے افتتاحی کلمات پیش کئے ۔
شمالی کرناٹک کے مختلف اضلاع اور مقامات سے بکریوں اور بکروں کے بیوپار یوں سمیت سیکڑوں نوجوان کے لئے دوپہر میں تربیتی ورکشاپ کا انعقاد کیا۔ جس میں خود بخشی صاحب یادواڑ اور محمد ارسلان موٹیا نے مختلف حالات میں جانوروں کی خریداری اور فروخت سمیت مارکیٹنگ کے متعلق رہنمائی کی۔ اس موقع پر ملن گوٹیافارم کے مالک بخشی صاحب نے خصوصی طورپر بھٹکل کے موٹیا گوٹس فارم کے مالک محمد ارسلان موٹیا کی ستائش کرتےہوئےبتایا کہ کورونا کی وجہ سے ملک بھر میں لاک ڈاؤن نافذ کیاگیا تھا تو بیلگام ، وجئے پور، باگلکوٹ اضلاع کے کئی سارے گوٹس فارم کے مالکان بمبئی گوٹس مارکیٹ بند ہوجانے سے کافی پریشان تھے۔ ان سگین حالات میں ان سب گوٹس مالکا ن کو بھٹکل کے محمد ارسلان موٹیا نے ہمت اور حوصلہ کے ساتھ ان کی مدد اور رہنمائی کی جس سے کئی لوگ خود کشی کے ارادے سے باز آتے ہوئے اپنے پیشہ سے دوبارہ وابستہ ہوکر خوشحال زندگی گزار رہےہیں ۔ محمد ارسلان موٹیا کی انسانی خدمت کے عوض پورے مالکان کی طرف سے ان کی تہنیت کی گئی ۔