بھٹکل یکم مارچ (ایس او نیوز) میسور و میں ہوئے سڑک حادثہ میں بھٹکل تعلقہ کے مرڈیشور سے تعلق رکھنے والے جناب مانی نوید (52) انتقال کرگئے۔ انا للہ و اناالیہ راجعون۔
ذرائع سے ملی اطلاع کے مطابق جناب مانی قادر باشہ کے فرزندمانی نوید جمعرات رات قریب سوا دس بجے اپنی اسکوٹر پر سوار کچھ ضروری کام سے گھر سے نکلے تھے کہ میسورو کے شانتی نگر میں ایک مینار مسجد کے قریب واقع روڈ پر ہمپ ہونے کی وجہ سے انہوں نے اپنی اسکوٹر کی رفتار کم کی، جس کے دوران پیچھے سے آنے والی ایک منی لاری نے ٹکر ماردی۔ ٹکر لگتے ہی وہ اپنی اسکوٹر سمیت روڈ پر گرگئے، جس کے بعد لاری کافی دور تک انہیں گھسیٹتے ہوئے لے گئی۔
حادثے کے فوری بعد انہیں قریبی اسپتال لے جایا گیا، مگر اُس وقت تک ان کی روح قبض ہوچکی تھی۔ نعش فی الوقت کے۔آر اسپتال کے مردہ خانے میں رکھی گئی ہے۔ پوسٹ مارٹم کے بعد گھروالوں کے حوالے کی جائے گی۔
مرحوم نوید کے تعلق سے پتہ چلا ہے کہ وہ پہلے سعودی عربیہ کے دارالحکومت ریاض میں برسرروزگار تھے، قریب تین ماہ پہلے ہی میسور آکر اپنا کاروبار سٹ کیا تھا، ان کے والد، والدہ، اہلیہ اور دو بیٹیاں میسور میں ہی رہتی ہیں۔
عینی شاہدین کا کہنا ہے کہ لاری ڈرائیور شراب کے نشے میں ڈرائیونگ کررہا تھا جس کی وجہ سے یہ حادثہ پیش آیا۔ بعض لوگوں نے شانتی نگر سڑک پر اسٹریٹ لائٹ نہ ہونے اور ہمپ پر ریفلیکٹر نہ ہونے سے متعلقہ مقام پر بار بار حادثے ہونے کی بھی شکایتیں کی ہیں۔
میسورو کے سدھارتھا پولس تھانہ میں معاملہ درج کیا گیا ہے۔
جناب نوید مانی کے انتقال پر مرڈیشور جماعت کے ذمہ داران کے ساتھ ساتھ مجلس اصلاح و تنظیم بھٹکل کے صدر جناب عنایت اللہ شاہ بندری اور جنرل سکریٹری جناب عبدالرقیب ایم جے ندوی سمیت دیگر ذمہ داران نے بھی گہرے دکھ کر اظہار کیا ہے اور اہل خانہ سے تعزیت کرتے ہوئے ان کے حق میں مغفرت کی دعائیں کی ہیں۔
پتہ چلا ہے کہ سنیچر کو میسور قبرستان میں ان کی تدفین عمل میں آئے گی۔