بھٹکل لاک ڈاؤن: کسی کے بیمارہونے پر ہیلپ لائن کو فون کریں، ڈاکٹر خود گھر پر پہنچ جائیں گے۔ضلع انتظامیہ کی یقین دہانی
بھٹکل 30/مارچ (ایس او نیوز) کورونا وائرس وباء کی وجہ سے جو لاک ڈاؤن کیا گیا ہے اس میں بہت سارے مسائل پیش آ رہے ہیں، جس میں ایک اہم مسئلہ لوگوں کے بیمار ہونے کی صورت میں اسپتال یا ڈاکٹر کے پاس مریض کو لے جانے کا ہے۔
چونکہ بھٹکل میں پوزیٹیو معاملات سامنے آئے ہیں اور ہیلتھ ایمرجنسی کے ساتھ ہائی الرٹ جاری کیا گیا ہے، اس دوران لوگ دوائیاں لینے یا ڈاکٹر کے پاس جانے کا عذر بتاکر گھر سے باہر نکل رہے ہیں۔اس کی وجہ سے لاک ڈاؤن اور مشتبہ افراد سے سماجی فاصلہ بنائے رکھنے کے مقاصد پوری طرح حاصل نہیں ہورہے ہیں۔
اب ضلع ڈپٹی کمشنر کی طرف سے جاری کیے گئے بیان میں یقین دہانی کی گئی ہے کہ لوگ طبی امداد پانے کے لئے پریشان نہ ہوں۔ لوگ کسی بھی صورت میں گھر سے باہر نہ نکلیں اور طبی ضرورت پیش آنے پر ہیلپ لائن نمبر پر کال کریں۔ ڈاکٹروں کو متعلقہ مقام پربھیجنے اور معائنے کے بعد ضروری علاج کرنے کا انتظام کیا جائے گا۔ اس کے علاوہ اگر ضرورت محسوس ہوئی تو ایمبولینس کے ذریعے مریض کو مزید علاج کے لئے اسپتال منتقل کیا جائے گا۔فی الحال ضلع انتظامیہ نے گھر پر پہنچ کر علاج و معالجہ کرنے کے لئے 8ڈاکٹروں کو متعین کیا ہے۔ آج سے 14اپریل کو لاک ڈاؤن کی مدت ختم ہونے تک یہ سہولت ہیلپ لائن کے ذریعے فراہم کی جائے گی۔