بھٹکل: 5؍جولائی(ایس اؤ نیوز) بھٹکل اسسٹنٹ کمشنر ممتادیوی جن کو ترقی دے کر تبادلہ کیا گیا ہے اوران کی جگہ پر وجیاپورمیڈیکل سائنس اینڈ ریسرچ انسٹی ٹیوٹ بیلاری کی چیف ایڈمنسٹریٹیو آفیسر ڈاکٹر نینا این (کے اے ایس ، جونیئر گریڈ) کولایا گیا ہے۔

ممتادیوی کی بھٹکل سے وداعی کو دیکھتے ہوئےسرکاری ملازمین کی جانب سے ایک وداعی تقریب کا انعقاد کیا گیا اور ان کی خدمات کی ستائش کرتے ہوئےانہیں میمنٹو اور پھولوں کے گلدستوں سے نوازا گیا۔

سرکاری ملازمین  کی جانب سے منعقدہ تہنتی پروگرام میں تہنیت قبول کرنے کے بعد اپنے تاثرات کا اظہارکرتےہوئے ممتادیوی نے کہا کہ افسر اگرعوام کے قریب ہوں گے تبھی انہیں عوامی مشکلات کا اندازہ ہوگا اورعوام کے مسائل کو حل کرنا آسان ہوگا۔ انہوں نے سرکاری ملازمین کو مشورہ دیتے ہوئے کہا کہ عوام اگر ہم تک پہنچتے ہیں تو ہمیں ان کی باتوں کو دھیان سے سننا چاہئے تبھی ہم اُن کے مسائل کا حل نکال سکیں گے۔ اے سی نے کہاکہ ہمارے جذبات اچھے ہونے چاہئے ، اسی وقت ہمارا عملہ بہترطور پرکام کرسکتا ہے۔ اس موقع پر انہوں نے اے سی دفتر کے عملےکی فرض شناسی کی ستائش کی۔

ممتا دیوی کے شوہرموہن جو منڈیا میں اسسٹنٹ کمشنر کے فرائض انجام دے رہے ہیں، وداعی تقریب میں شریک تھے، انہوں نے اپنے خیالات کا اظہار کرتےہوئے کہاکہ ہمیں سرکاری نمائندے کےطورپرسرکاری پروگراموں کو عوام تک جلد سے جلد پہنچانا چاہئے۔ کمٹہ کے اے سی راگھویندر نے بات کرتے ہوئے اے سی ممتا دیوی کی جانب سے دئیے گئے صلاح مشورےاور انتخابات کے دوران ان کی رہنمائی  کی ستائش کی اور کہاکہ انہوں نے میری رہنمائی کی اور مجھے مشوروں سے نوازا جو میرے لئے بہت اہمیت رکھتے ہیں۔ تعلقہ میڈیکل آفیسر ڈاکٹر سویتا کامت نے بھی ممتا دیوی کے عوامی جذبے کی تعریف کرتےہوئے ایک واقعہ کا تذکرہ کرتے ہوئے کہاکہ  اسپتال میں  موت وحیات کی جنگ لڑنے والی  ایک عورت کو دیکھنے کےلئے دیر رات ممتادیوی نے اسپتال کا دورہ کیا تھا۔ کنڑا ساہتیہ پریشد کے صدر گنگادھر نائک، کنڑا صحافی رادھا کرشنا بھٹ، تحصیلدار تپے سوامی، تعلقہ پنچایت ای اؤ پربھاکر چکنمنے، محکمہ روینیو کے جان باشا سمیت کئی دیگر نے بھی اپنے خیالات کااظہار کیا۔ استاد شری دھر شیٹھ نے افتتاحی کلمات پیش کرتے ہوئے پروگرام کی نظامت کی۔