بھٹکل: چتراپور سرکاری پرائمری اسکول کے طلبا کا ضلعی سطح کے کھیل مقابلوں میں بہترین مظاہرہ : ضلعی چمپئین شپ سمیت تین طلبا ریاستی سطح کےلئے منتخب
بھٹکل:29؍ ستمبر(ایس اؤ نیوز)کاروار تعلیمی ضلع لیول پرائمری اسکول کھیل مقابلوں میں سرکاری ماڈل پرائمری اسکول چتراپور کے طلبا و طالبات نے بہترین مظاہرہ پیش کرتےہوئے ریاستی سطح کے لئے منتخب ہوئےہیں۔
26ستمبر بروز پیر کو سرکاری ہائی اسکول تنگنگنڈی میدان میں منعقدہ ضلع پرائمری لیول کھیل مقابلوں میں چتراپور سرکاری اسکول کی طالبہ دکشھتا گنپتی نائک 600میٹر اور 400میٹر کی دوڑ مقابلے میں اسی طرح 80میٹر ہرڈلس مقابلے میں اول مقام حاصل کرتےہوئے ضلع چمپئین شپ کی حق دار قرار پائی ہیں۔ اسی طرح کرون دیویندر نائک نامی متعلم نے 600میٹر کی دوڑ میں اول اور 400میٹر کی دوڑ میں سوم مقام پایا ہے۔ جبکہ طالبہ رشمیتا گنپتی دیواڑیگا نے 400میٹرکی دوڑ میں دوسرا مقام پایا ہے۔ ضلعی لیول پر کامیاب ہونے کے بعداب یہ تینوں بچے ریاستی سطح کےلئے منتخب ہوئے ہیں۔
اسکول کی کھوکھو ٹیم طالبا ت نے بھی کھوکھو مقابلے میں دوسرا مقام حاصل کیاہے تو ٹیم کی تین طالبات دیپیکا نائک، یشسوینی نائک، جیا نائک بیلگام زون کی کھوکھوٹیم کےلئے منتخب ہوئی ہیں۔ ان تمام کھلاڑیوں کی اسکول کے پی ای ٹیچر رام داس اگیر نے تربیت کی تھی۔
خیال رہےکہ چتراپور کی سرکاری پرائمری اسکول کے طلبا پچھلے 5برسوں سے مسلسل ریاستی سطح کے لئے منتخب ہوتے رہے ہیں تو 2018میں اسکول کے متعلم کلدیپ کمار قومی سطح کےلئے منتخب ہوئے تھے۔ ضلع چمپئین شپ کی حق دار بنی طالبہ دکشھتا اور ریاستی سطح کےلئے منتخب ہونےوالےطلبہ کو اسکول ایس ڈی ایم سی صدر پربھاکر رام نائک ، ممبران ، صدر مدرس رام ایس گونڈ اور اساتذہ نےمبارکبادی پیش کی ہے۔