بھٹکل:17؍ستمبر(ایس اؤ نیوز)اترکنڑا ضلع کے فاریسٹ علاقوں کو شراوتی فاریسٹ حدود میں شامل کئے جانےکی مذمت کرتےہوئے اترکنڑا ضلع فاریسٹ بھومی حقوق ہوراٹا گاررویدیکے نے منگل کو بھٹکل اسسٹنٹ کمشنر کے توسط سے ریاستی گورنر کے نام میمورنڈم پیش کیا جس میں متعلقہ بل کو فوری طورپر واپس لینے کامطالبہ کیا گیا ہے۔

میمورنڈم میں بتایا گیا ہے کہ ریاستی محکمہ جنگلات کی طرف سے  اترکنڑا ضلع کے اگھناشنی علاقے کی 30ہزار ایکڑ فاریسٹ زمین کو شراوتی  جنگلاتی علاقے میں شامل کرنے کا حکم جاری کیا گیا ہے، متعلقہ حکم سے جنگلات میں مقیم مکینوں کو کافی تکالیف اور پریشانیوں کا سامناکرناپڑےگا۔ جنگلی جانوروں کی حفاظت کے لئے1978ء میں ہی جنگلات کو  اگھناشنی اور شراوتی زون کے طورپر تقسیم کیاگیا تھاجس کا احاطہ  43ہزار ہیکٹر پر مشتمل ہے۔ اس تعلق سے فوریسٹ افسران کا کہنا ہے کہ شیموگہ ضلع کے 4ہزار ہیکٹر جنگل اور اترکنڑا ضلع کے 44ہزار ہیکٹر جنگل کو ایک کرنے سے جنگلی جانوروں کی حفاظت کرنا آسان ہوگا ۔جب کہ جنگلات پر منحصر مکینوں کا کہنا ہے کہ اس طرح جنگلات کو شامل کئے جانے سے مکینوں پر برے اثرات مرتب  ہونگے اور ان کی رہائشی غیریقینی ہوجائے گی، جس کو دیکھتے ہوئے  ہم اس حکم نامہ کی سخت مخالفت کرتے  ہیں۔ میمورنڈم میں متعلقہ حکم نامے کو فوری طورپر واپس لینے کا مطالبہ کیاگیا ہے۔

بھٹکل اے سی دفتر میں آفیسر ایل اے بھٹ نے میمورنڈم وصول کیا۔ اتی کرم دار ہوراٹا گار ویدیکے کے سلیمان ، عبدالقیوم ، رضوان، ایف کے موگیر، عنایت اللہ شاہ بندری سمیت سینکڑوں لوگ موجود تھے۔