بھٹکل : انجمن کی طالبہ فاطمہ زہرہ قرأت مقابلے میں ریاستی سطح پراول؛ 31 اضلاع سےآئے ہوئے ٹاپرس پرحاصل کی زبردست سبقت
بھٹکل:07؍ جنوری(ایس اؤ نیوز )انجمن انگلش میڈیم گرلس ہائی اسکول، نوائط کالونی کی طالبہ فاطمہ زہرہ بنت صابراحمد چامنڈی نے ریاستی سطح کے پرتیبھا کارنجی کے قرأت قرآن مقابلے میں اول مقام حاصل کرتےہوئے انجمن کے ساتھ ساتھ پورے بھٹکل اورضلع اُترکنڑا کا نام روشن کردیا ہے۔
اسکول کی جانب سے جاری کی گئی پریس ریلیز کےمطابق شیموگہ کے کوئمپو میں 7 جنوری کو یہ مقابلہ منعقد ہوا تھا جس میں ضلع اُترکنڑا کی نمائندگی کرتے ہوئے بھٹکل انجمن کی اس نہم جماعت کی طالبہ نے بہترین پرفارمینس پیش کرتے ہوئے اول مقام حاصل کیا ہے۔
طالبہ کے والد صابر چامنڈی نے بتایا کہ ریاستی سطح پر اول مقام حاصل کرنے کے بعد منتظمین نے اُنہیں بتایا ہے کہ اس کی بیٹی فاطمہ زہرہ نے اب دہلی میں منعقد ہونے والے نیشنل لیول پرتیبھا کارنجی کے لئے کولیفائی کیا ہے، وہ اب ریاست کرناٹک کی نمائندگی کرے گی۔ دہلی میں یہ مقابلے کب ہوں گے،اس کی تفصیلات عنقریب دی جائے گی۔
واضح رہے کہ 14 سالہ فاطمہ زہرہ نے پہلے بھٹکل تعلقہ لیول پراول مقام حاصل کرنے کے بعد ڈسٹرکٹ لیول میں حصہ لیا تھا جو انکولہ میں منعقد ہوا تھا، انکولہ میں بھی اول مقام حاصل کرنے کے بعد شموگہ میں منعقدہ ریاستی سطح کے پریتیبھا کارنجی مقابلے میں شریک ہونے کا موقع ملا۔ اور یہاں ریاست کے 31 اضلاع سے آئے ہوئے ٹاپرس پرزبردست سبقت حاصل کرتے ہوئے اول مقام حاصل کرنے میں کامیاب رہی۔ اب وہ نیشنل لیول مقابلے میں حصہ لے گی، مگر بتاتے چلیں کہ اس طالبہ کا ریاستی سطح پر اول مقام حاصل کرنا ہی بھٹکل کے لئے ایک بہت بڑا اعزاز ہے۔
طالبہ کی اس بہترین کارکردگی پرمسرت کااظہار کرتےہوئےانجمن حامئی مسلمین بھٹکل کے صدر قاضیامزمل، جنرل سکریٹری صدیق اسماعیل، ایڈیشنل جنرل سکریٹری اسحق شاہ بندری سمیت عہدیداران، انتظامیہ ممبران، صدرمدرسہ اور اساتذہ نے مبارکباد پیش کی ہے اور مستقبل میں بھی مزید کامیابیوں کے لئے نیک خواہشات کا اظہار کیا ہے۔