بنگلورو ، 3/مارچ (ایس او نیوز/ایجنسی )   بنگلورو کے مقبول رامیشورم کیفے میں ہوئے دھماکے کی وجہ اور نوعیت جاننے کے لیے تحقیقات کی جا رہی ہیں اور شبہ ہے کہ یہ دھماکہ ‘آئی ای ڈی’ کی وجہ سے ہوا ہے۔ معلومات کے مطابق 12 بجے کے بعد کوئی شخص بیگ رکھ کر چلا گیا۔ جس میں بعد میں دھماکہ ہوگیا۔ بیگ میں بم لانے والے مشتبہ کی تصویر سی سی ٹی وی میں قید ہے۔ یہ بم دھماکہ مکمل منصوبہ بندی کے ساتھ کیا گیا ہے۔ بتایا جاتا ہے کہ پہلے تو مشتبہ شخص نے کیفے میں کھانے کا آرڈر دیا اور بیگ میز کے قریب رکھ دیا۔ اس کے بعد وہ ہاتھ دھونے کے بہانے وہاں سے چلا گیا اور پھر دھماکہ ہوا۔

اس دھماکے میں زخمی ہونے والی ایک خاتون کی حالت بدستور تشویشناک ہے۔ اس دھماکے کے لیے ٹائمر کا استعمال کیا گیا۔ اس بم ڈیوائس میں 9 وولٹ کی ایک بیٹری لگائی گئی تھی۔ آئی ای ڈی میں شارپ نیلز کے بجائے نٹ اور بولٹ استعمال کیے گئے ہیں۔ کیفے میں داخل ہونے کے بعد مشتبہ شخص پہلے کیش کاؤنٹر سے ٹوکن لیتا ہے اور پھر ڈائننگ ایریا میں ایک بیگ رکھتا ہوا نظر آرہا ہے۔ پولیس کو شبہ ہے کہ یہ دھماکہ اسی شخص نے کیا ہے۔

بنگلورو دھماکے کی تحقیقات میں مرکزی ایجنسیاں تین ماڈیول کو رڈار پر رکھ کر کام کر رہی ہیں۔ یہ تین ماڈیول داعش کا بلاری ماڈیول، پی ایف آئی ماڈیول اور لشکر طیبہ ماڈیول ہیں۔ ان کے حالیہ انداز سے یہ شبہ پیدا ہو رہا ہے کہ ان میں سے ہی کسی ایک نے ایک بار پھر کیفے کو نشانہ بنایا ہے۔