بیلتنگڈی : اسکولی طالبہ کو حاملہ بنانے کا معاملہ - کلیدی ملزم گرفتار
بیلتنگڈی ،18؍ جنوری (ایس او نیوز) اسکول میں چھٹی کے دوران اپنے پڑوسی کے گھر پر ٹی وی دیکھنے کے لئے جانے والی نابالغ طالبہ کے ساتھ جنسی تعلقات قائم کرنے اور اسے حاملہ بنانے کے بعد حمل ساقط کرنے کے معاملہ میں ملوث کلیدی ملزم سدھیر (25 سال) کو پولیس نے گرفتار کرلیا ۔
خیال رہے کہ اس معاملہ میں شامل ہونے کے الزام میں پولیس نے سدھیر کی ماں پاروتی (60 سال) ، منوہر (23 سال) اور مدھو (55 سال) کو پہلے ہی گرفتار کر لیا ہے ۔
بتایا جاتا ہے کہ عصمت دری کا شکار ہوئی لڑکی اسکول میں چھٹیاں ہونے پر اور اتوار کے دن پڑوسی سدھیر کے گھر میں ٹی وی دیکھنے کے لئے جاتی تھی۔ ایک دن موقع پر سدھیر اس لڑکی کو قریب میں موجود اپنی نانی کے گھر لے گیا اور وہاں اس کے ساتھ جنسی تعلق قائم کیا ۔ پھر جب اسے لڑکی حاملہ ہونے کی بات معلوم ہوئی تو اس نے اپنی ماں اور دو دیگر رشتہ داروں کو اعتماد میں لے کر لڑکی کو اسپتال لے گیا اور اس کا حمل ساقط کروایا ۔ مبینہ طور پر سدھیر کی ماں پاروتی نے اسپتال میں ڈاکٹر کو یہ کہہ کر گمراہ کیا تھا کہ وہ لڑکی کی ماں ہے ۔
پولیس اسٹیشن میں کیس درج ہونے کے بعد سدھیر لاپتہ ہوگیا تھا اور پولیس اس کو شدت سے تلاش کر رہی تھی کیونکہ بیلّوا سماج کی طرف سے ملزم کو گرفتار کرنے کے لئے دباو بنایا جا رہا تھا ۔ پھر ملزم چکمگلورو میں موجود ہونے کی اطلاع ملنے پر سرکل انسپکٹر شیوا کمار کی قیادت میں پولیس نے کارروائی کی اور ملزم سدھیر کو گرفتار کر لیا ۔
پولیس کا کہنا ہے کہ اس نے تمام ملزمین پر پوکسو قانون کے تحت کیس دائر کیا ہے ۔ مزیدتحقیقات جاری ہے ۔