بیلتنگڈی،2؍جون (ایس او نیوز) کاکنجے نامی علاقے میں ایک مکان پر ایئر کنڈیشنر کی مرمت کرتے وقت بجلی کا شاک لگنے سے اے سی میکانک ہلاک ہوجانے کی المناک واردات پیش آئی ہے۔

 مہلوک کی شناخت محمد شیرازکے طور پر کی گئی ہے جو اتّیجے کا رہنے والا تھا اور اُجیرے میں اے سی میکانک کی دکان چلارہاتھا۔ بتایاجاتا ہے کہ یکم جو ن کو وہ اپنے ایک رشتے دار کے گھر جب اے سی مرمت کررہاتھا تو اچانک بجلی کا جھٹکا لگااور اس کی طبعیت خراب ہوگئی۔ فوری طور پراسے ایک مقامی اسپتال لے جایا گیا پھر وہاں سے اُجیرے کے ایک نجی اسپتال میں منتقل کیا گیامگر اس نے راستے میں ہی دم توڑ دیا۔پولیس نے حادثاتی موت کا معاملہ درج کرلینے کے بعد لاش کو پوسٹ مارٹم کے لئے بیلتنگڈی سرکاری اسپتال میں منتقل کردیا۔