باگلکوٹ 29 / جنوری (ایس او نیوز) جمکھنڈی تعلقہ کے آلگور نامی گاوں کے قریب اسکول بس اور ٹریکٹر کے درمیان پیش آئے خطرناک تصادم کے نتیجے میں پی یو سی اور نوویں جماعت میں پڑھنے والے چار طلبہ ہلاک ہوگئے جن میں ایک لڑکی بھی شامل ہے ۔جبکہ 28 سے زائد طلبہ زخمی ہوئے جس میں 8 طالب علم کو شدید چوٹیں آئی ہیں۔
حادثے میں ہلاک ہونے والے طلبہ کی شناخت پی یو سی میں زیر تعلیم ساگر کڈکول (17 سال)، بسووا راج (17 سال) اور نوویں جماعت میں زیر تعلیم شویتا (13 سال)، گووند (13 سال) کے طور پر کی گئی ہے ۔ بس میں سوار تمام طالب علم وردھمان ایجوکیشن انسٹی ٹیوٹ میں زیر تعلیم تھے اور اسکول کی سالانہ گیدرنگ میں حصہ لینے کے بعد اپنے گاوں واپس لوٹ رہے تھے ۔
ذرائع سے ملی اطلاع کے مطابق تمام الگور میں واقع اسکول کے سالانہ جلسہ میں شریک ہونے کے بعد اتواررات قریب بارہ بجے اپنے اپنے گھر لوٹ رہے تھے جس کے دوران سڑک کنارے پارک ایک گنے کی ٹریکٹر سے اسکول بس ٹکراگئی۔
حادثے میں زخمی طلبہ کو سرکاری اسپتال منتقل کیا گیا جہاں سے بعض طلبہ کو اُن کے والدین نے پرائیویٹ اسپتال لے گئے جبکہ بعض طلبہ کو زائد علاج کے لئے وجئے پور اسپتال شفٹ کیا گیا ہے۔