بھٹکل نوائط کالونی نیشنل ہائی وے پر آٹو رکشہ اور پیک اپ کی ٹکر؛ آٹو ڈرائیور شدید زخمی
بھٹکل 24/نومبر(ایس او نیوز) بولیرو پِک آپ وین اور آٹو رکشہ کے درمیان ہوئی ٹکر میں آٹو ڈرائیور شدید زخمی ہوگیا جسےبھٹکل سرکاری اسپتال میں ابتدائی طبی امداد فراہم کرنے کے بعد اُڈپی اسپتال لے جایا گیا ہے۔ حادثہ جمعہ کی شام قریب چھ بجے نوائط کالونی نیشنل ہائی وے، سٹی لائٹ کراس پر پیش آیا۔
زخمی ڈرائیو ر کی شناخت آزاد نگر کے رہائشی جاوید (55) کی حیثیت سے کی گئی ہے۔ آٹو کی پچھلی سیٹ پر سوار ان کی اہلیہ سعیدہ حمیدہ بانو کو بھی معمولی چوٹیں آئی ہیں اور انہیں بھٹکل سرکاری اسپتال میں طبی امداد فراہم کی گئی ہے۔
سعیدہ حمیدہ بانو نے بتایا کہ وہ جالی روڈ پر واقع ایک پرائیویٹ اسپتال سے سٹی لائٹ ہوتے ہوئے واپس اپنے گھر آزاد نگر(نزد امام ابو حنیفہ مسجد) جانے کے لئے نکلے تھے، سٹی لائٹ کراس پر بولیرو وین تیزی کے ساتھ آٹو سے ٹکراگئی۔ پتہ چلا ہے کہ بولیرو وین مرڈیشور کی طرف جارہی تھی۔
حادثے میں جاوید کے سر کو شدید چوٹ لگی ہے جس کی وجہ سے انہیں فوری طور پر اُڈپی اسپتال منتقل کیا گیا ہے۔
