بھٹکل 15/مئی (ایس او نیوز) شہر کی مشہور اور تاریخی سلطانی مسجد کے احاطہ میں گذشتہ روز مدرسہ خیر العلوم کا تیسرا سالانہ اجلاس اور مکتب خیرالعلوم کے طلبہ کا انوکھا اور منفرد پروگرام منعقد ہوا جس میں عوام الناس کی کثیر تعداد شریک رہی۔
جلسہ کا آغاز متعلم مدرسہ مستعصم بافقی کی تلاوت کلام پاک سے ہوا،متعلم مدرسہ اسماعیل کوڈا نے نوائطی زبان میں خوبصورت نعت سنا کر سامعین کو محظوظ کیا۔ پھر مکتب کے ننھے منے طلبہ نے دلچسپ پروگرام پیش کئے۔ خصوصاً پانچ چھ سالہ عمر کی سطح کے ننھے منے معصوم طلبہ کے لئے منعقدہ ”پک اینڈ اسپیک“ اور ”منّا کوئز مقابلہ“ جیسے انوکھے، البیلے اور اپنے انداز کے دو منفرد پروگراموں سے سامعین نے خوب لطف لیا۔ بعض اھل خیر حضرات نے اپنی طرف سے انعامات کا بھی اعلان کیا۔مدرسہ کے بڑے طلبہ نے بھی عربی اردو میں بہترین تقاریر اور ترانہ کے ذر یعہ بخوبی اپنا تعلیمی مظاہرہ کیا۔ لوگوں کے لبوں پر ماشاء اللہ اور شاباش کے زمزمے شروع سے اخیر تک وقتا فوقتا جاری رہے۔
نظامت کے فرائض معلم مدرسہ مولانا احمدطارق اکرمی ندوی (استاذ تفسیر وحدیث) اور معلم مدرسہ مولانا ابوذر عجائب ندوی نے انجام دئے جلسہ کے مہمان خصوصی مولانا عبید اللہ ابوبکر صاحب ندوی(بانی وناظم: مدرسہ ضیاء العلوم کنڈلور) نے اپنے احساسات و تأثرات بڑے دلنشین انداز اور خطیبانہ لب ولہجہ میں بیان کیے۔ اخیر میں مدرسہ کے سرپرست اعلیٰ مولانا محمد صادق صاحب اکرمی ندوی کے کلمات عالیہ اور دُعا کے ساتھ جلسہ اپنے اختتام کوپہونچا۔