بھٹکل 17 جنوری (ایس او نیوز) کمٹہ ونلّی جماعت کے سابق صدر جناب امان اللہ حُسین شمالی (65) ہوناور کے قریب روشن محلہ نیشنل ہائی وے پر ہوئے سڑک حادثہ میں انتقال کرگئے۔ انا للہ و اناالیہ راجعون
موصوف اپنی ایکٹیوا اسکوٹر پر سوار بھٹکل سےآگے منکی سے کمٹہ جانے کے لئے نکلے تھے، ظہر کی نماز کا وقت ہونے پر روشن محلہ نیشنل ہائی وے پر واقع مسجد میں جانے کے لئے گاڑی کو گھمایا ہی تھا کہ اچانک مینگلور سے کمٹہ کی طرف جانے والی ایک کار ان کی ایکٹیوا سے ٹکراگئی۔
ٹکر سے جناب امان اللہ کے سر کو شدید چوٹ لگی، انہیں فوری طور پر مینگلور لے جایا گیا، مگر شام ہوتے ہوتے خبر موصول ہوئی کہ نماز جانے کے ارادہ سے مسجد کا رُخ کرنے والے امان اللہ خالق حقیقی کے بلاوے پر لبیک کہہ گئے ہیں۔ اللہ غریق رحمت کرے اور ان کی بھرپور مغفرت فرمائے۔
جناب امان اللہ حسین کے تعلق سے کمٹہ جماعت المسلمین کے جنرل سکریٹری جناب محسن قاضی نے بتایا کہ آمان اللہ صاحب نہایت سخی انسان تھے، ساتھ ساتھ متقی، پرہیزگار، دیندار، ایماندار، پنج وقتہ نمازی اور سنجیدہ انسان تھے۔ کمٹہ میں ان کا جالے کا بزنس تھا۔ کمٹہ جماعت المسلمین کے ذ مہ داروں کے ساتھ ان کے اچھے روابطہ تھے، قومی و ملی کاموں میں ہمیشہ متحرک رہتے تھے۔ ان کے انتقال سے کمٹہ میں سوگ کا ماحول ہے، جماعت نے ایک اچھے اور فعال انسان کو کھویا ہے، اللہ رب العزت ان کی خدمات کو قبول فرمائے، بال بال مغفرت فرمائے، جنت الفردوس میں اعلیٰ مقام عطا فرمائے اور تمام اہل خانہ کو صبر جمیل عطا فرمائے۔ اٰمین
میت فی الحال مینگلور اسپتال میں ہی ہے، کاغذی کاروائیوں کے بعد کمٹہ لائی جائے گی۔ ان کے انتقال پر کمٹہ کے کئی دیگر ذمہ داران نے بھی گہرے دکھ کا اظہار کیا ہے اور اہل خانہ کے ساتھ تعزیت کرتے ہوئے مرحوم کے حق میں دعائے مغفرت کی ہے۔