کلبرگی4/دسمبر (ایس او نیوز) آندھرا پردیش میں ایک ویٹرنری خاتون ڈاکٹر کی عصمت دری کرنے اور اسے جلاکر مارڈالنے کا معاملہ پورے ملک میں عوامی اشتعال کاسبب بنا ہوا ہے۔ اسی دوران ریاست کرناٹکا کے کلبرگی میں چنچولی تعلقہ کے دیہات یاکاپور میں دل دہلانے والی واردات پیش آئی ہے جس میں ایک  35سالہ شخص نے8سالہ بچی کو اپنی ہوس کا نشانہ بنایا ہے اوراسے جان سے مارڈالا ہے۔

پولیس کے بیان کے مطابق دوسری جماعت میں پڑھنے والی لڑکی جب اسکول نہیں پہنچی اور اسکول کا وقت ختم ہونے کے بعد گھر بھی واپس نہیں لوٹی تو بچی کے والدین نے اسے ڈھونڈھنا شرو ع کیا۔ اس دوران کچھ لوگوں نے بتایا کہ بچی کو اسی گاؤں کے ایلپّا نامی شخص کے ساتھ گھومتے ہوئے دیکھا گیا تھا۔ جب گھر والوں نے ایلپّا سے اس بارے میں پوچھا تو اس نے لڑکی کے بارے میں لاعلمی ظاہر کی اور غیر تشفی بخش جوابات دینے لگا۔ گاؤں والوں نے اسے سولے پیٹ پولیس اسٹیشن کے حوالے کیا اور لڑکی کی تلاش جاری رکھی۔ اس دوران گاؤں کے آنگن واڈی اسکول کے پیچھے واقع ایک نالے میں بچی کی لاش پائی گئی۔اس کے علاوہ وہیں قریب میں ایلپّا کی خون آلود انڈر ویئر بھی پڑی ہوئی ملی۔جس سے اس بات کو تقویت مل گئی کہ بچی کے ساتھ عصمت ریزی کے بعد اس کا قتل کیا گیا ہے۔ایلپّا کے بارے میں معلوم ہوا ہے کہ وہ پیشے سے درزی اور شادی شدہ ہے، لیکن اس کی بیوی اپنے عاشق کے ساتھ فرار ہوگئی ہے۔

بچی کی عصمت دری اور قتل کی خبر جیسے ہی عام ہوگئی توضلع بھر میں سماجی کارکنان اور طلبہ نے سڑکوں پر اتر کر اس واقعے کے خلاف سخت احتجاج کیا۔اور ملزم کو کڑی سزا دینے کا مطالبہ کیا۔اس معاملے کو گلبرگہ کے بی جے پی رکن پارلیمان اومیش جادھو نے لوک سبھا میں بھی اٹھایااور مجرم کو سخت سزا دینے کی مانگ رکھی۔

ضلع ایس پی لاڈا مارٹن نے بتایا کہ ملزم کے خلاف کیس درج کرلیا گیا ہے اور مزید تحقیقات کی جارہی ہیں۔