بھٹکل کے تینگن گنڈی میں غیر قانونی طور پر لہرائے گئے بھگوا جھنڈے کو اور ساورکر کے بورڈ کو ہٹادیا گیا؛ پولس کا سخت بندوبست
بھٹکل، 7 / مارچ (ایس او نیوز) ہیبلے گرام پنچایت کے تینگن گنڈی میں رکن پارلیمان اننت کمار ہیگڑے کی قیادت میں بی جے پی کارکنان کے ذریعے عوامی جگہ پر کسی قسم کی اجازت کے بغیر لہرایا گیا ہنومان کے عکس والا بھگوا جھنڈا اور ویر ساورکر کا بورڈ پنچایت کے افسران نے بدھ کے دن دیر رات کو ہٹا دیا ہے ۔
اس ضمن میں مذہبی جذبات کو ٹھیس پہنچانے اور فرقہ وارانہ اشتعال انگیزی کرنے کا الزام لگاتے ہوئے رکن پارلیمان اننت کمار ہیگڑے اور ان کے 20 ساتھیوں کے خلاف منگل کے دن پی ڈی او نے بھٹکل دیہی پولیس اسٹیشن میں شکایت درج کروائی تھی ۔
غیر قانونی طور پر لہرایا گیا جھنڈا اور آویزاں کیا گیا بورڈ ہٹانے کے بعد ماحول میں امن و امان برقرار رکھنے کے مقصد سے مذکورہ مقام پر پولیس نے حفاظتی بندوبست سخت کر دیا ہے ۔ فی الحال حالات پوری طرح پُر امن ہیں ۔
مقامی ماہی گیروں کا کہنا ہے کہ صرف غیر قانونی جھنڈا اور بورڈ ہٹایا گیا ہے ، لیکن سرکاری جگہ پر جھنڈا لہرانے کے لئے غیر قانونی طور پر تعمیر کیا گیا پلیٹ فارم اور اس پر نصب کیا گیا کھمبا نہیں ہٹایا گیا ہے ۔ چونکہ اس علاقے میں تمام طبقات کے لوگ امن و امان کے ساتھ رہتے ہیں، اس لئے آئندہ اس پلیٹ فارم اور کھمبے کی وجہ سے پھر سے ناخوشگوار حالات پیدا ہونے کے امکانات موجود ہیں ۔ لہٰذا فوری طور پر اس پلیٹ فارم اور کھمبے کو بھی متعلقہ مقام سے ہٹانا بہت ضروری ہے ۔