بھٹکل 18/مئی (ایس اونیوز)  پہلے گلف پھر مینگلور اور اب مہاراشٹرا کانام سامنے آرہا ہے جہاں سے کورونا وائرس ضلع اُترکنڑا میں داخل ہورہا ہے۔ تشویش کی بات یہ ہے کہ آج پیر کو ایک ساتھ ضلع اُترکنڑا میں سات کورونا کے معاملے سامنے آئے ہیں جس میں  ہوناور سے تعلق رکھنےوالے چار، منڈگوڈ سے دو اور بھٹکل سے ایک سمیت جملہ سات لوگوں کی رپورٹ کورونا پوزیٹو آئی ہے اور یہ تمام مہاراشٹرا سے   ضلع میں داخل ہوئے ہیں۔ بتایا گیا ہے کہ ضلع میں داخل ہوتے ہی انہیں کورنٹائن میں رکھا گیا تھا اور تھوک کے سیمپل جانچ کے لئے روانہ کئے گئے تھے، جن کی رپورٹ کل اتوار شام کو موصول ہوئی، مگر آج پیر کو سرکاری سطح پر اس کی تصدیق کی گئی ہے۔

خبر ملی ہے کہ ہوناور میں جن چار لوگوں کی رپورٹ کورونا پوزیٹو آئی ہے،وہ ایک  ہی فیملی کے لوگ ہیں  ، بتایا گیا ہے کہ ان کا تعلق   ہوناور کے ماگوڈ سے ہے ، لیکن ان چاروں  کوبی سی ایم ہوسٹل میں   کورنٹائن  کرکے  ان کے تھوک کےسیمپل جانچ کےلئے روانہ کردئے گئے تھے، جن کی رپورٹ آج کورونا پوزیٹو آئی ہے۔تازہ اطلاع کے مطابق ان چاروں کوپہلے ہوناور سرکاری اسپتال میں لے جانے کے بعد چاروں کو کاروار کیمس میں روانہ کیا گیا ہے۔

اُدھر منڈگوڈ سے ملی اطلاع کے مطابق آج پیر کو وہاں  جن دو لوگوں کی رپورٹ کورونا پوزیٹو آئی ہے، وہ منڈگوڈ سے سات کلو میٹر دور واقع  بڈی گیرا دیہات کے رہنے والے ہیں، ممبئی میں محنت مزدوری کرکے گذرا کررہے تھے، لاک ڈاون کے بعد واپس منڈگوڈ آئے تھے، مگر انہیں بھی منڈگوڈ میں داخل ہوتے ہی سرکاری کورنٹائن میں رکھا گیا تھا، جن کی رپورٹ کورونا پوزیٹو آئی ہے۔

بھٹکل کے جس 27 سالہ نوجوان کی رپورٹ کورونا پوزیٹو آئی ہے، اُسے مرڈیشور کے ایک ہوٹل میں کورنٹائن  کیا گیا تھا (رپورٹ رات کو ہی شائع ہوچکی ہے) آج اس نوجوان کی رپورٹ کی بھی سرکاری طور  پر تصدیق کی گئی ہے۔

آج ضلع میں کورونا کے سات معاملے سامنے آنے کے ساتھ ہی اُترکنڑا میں کورونا کے معاملوں کی تعداد بڑھ کر 48 ہوگئی ہے جس میں صرف بھٹکل سے تعلق رکھنے والوں کی تعداد 41ہے ۔  یاد رہے کہ  ان میں سے 11 لوگ صحت یاب ہوکر اسپتال سے ڈسچارج ہوچکے ہیں۔ اس طرح ضلع میں 37 کیسس ایکٹیو ہے۔

اس خبر سے منسلک پہلے شائع کی گئی خبر:

کیا بھٹکل میں پھر کورونا پوزیٹو کا معاملہ سامنے آیا ؟ کہاں سے آیا تھا یہ نوجوان ؟