اُترکنڑا میں آج کورونا کے 64 معاملات؛ بھٹکل کے مضافاتی علاقوں میں بڑھ رہے ہیں کوویڈ کیسس؛ کائیکنی میں ایک کی موت
بھٹکل 22 جولائی (ایس او نیوز) آج بدھ کو ضلع اُترکنڑا میں کوویڈ کے 64 معاملات درج ہوئے ہیں جس میں کاروار میں 21، ہلیال میں 16، کمٹہ میں 11، بھٹکل میں 11، منڈگوڈ میں 2 اور سداپور میں ایک کیس کی تصدیق ہوئی ہے۔
ایک وقت تھا جب بھٹکل کے شہری علاقوں سے ہی کورونا کے معاملات سامنے آرہے تھے مگر اب معاملہ اُلٹ گیا ہے اور بھٹکل کے مضافاتی علاقوں سے کورونا کے کیسس کی تعداد بڑھتی جارہی ہے۔ذرائع نے بتایا ہے کہ بھٹکل کے گیارہ معاملوں میں آج کائیکنی میں ایک 65 سالہ شخص کی موت بھی ہوئی ہے جس کی رپورٹ کوویڈ۔19 آنے کی تصدیق ہوئی ہے۔ جبکہ منڈلی سے دو مٹھلی سے دو، بیلکے سے دو، بھٹکل ٹاون سے دو اور سرپن کٹہ، جالی سے ایک ایک کی رپورٹ پوزیٹیو آئی ہے۔ اس تعلق سے بھٹکل اسسٹنٹ کمشنر مسٹر بھرت نے بھٹکل میں دس لوگوں کی رپورٹ پوزیٹیو آنے کی تصدیق کی ہے۔ بھٹکل سب ڈیویژن اسسٹنٹ کمشنر کے ذریعے دی گئی اطلاع کے مطابق آج بدھ کو بھٹکل کے 158 اور ہوناور کے 41 لوگوں کی رپورٹ نیگیٹیو بھی آئی ہے۔
دبئی سے آکر کورنٹائن مکمل کرنے والوں کو بھیجا گیا گھر: 8 جولائی کو دبئی سے چارٹرڈ فلائٹ کے ذریعے جو 178 لوگ بھٹکل پہنچے تھے ان میں سے 78 لوگوں کو ہوٹل کولا پیراڈائز ،95 کو علی پبلک اسکول اور دیگر 5/6 لوگوں کو انجمن کورنٹائن سینٹر میں رکھا گیا تھا، آج 14 دن کا کورنٹائن مکمل کرنے کے بعد ان سبھوں کو گھر بھیجا گیا ہے۔ پتہ چلا ہے کہ ان میں سے قریب 140 لوگوں کی رپورٹ نیگیٹیو آچکی ہے، البتہ کئی دیگر لوگوں کی رپورٹ آنی باقی ہے۔ گھر بھیجے گئے تمام لوگوں کو ہدایات دی گئی ہیں کہ وہ اگلے سات دنوں تک اپنے اپنے گھروں میں ہی کورنٹائن کریں اور گھر سے باہر نہ نکلیں۔ اس تعلق سے آج صبح بھٹکل تحصیلدار ایس روی چندرا نے علی پبلک اسکول پہنچ کر کورنٹائن کرنے والوں سے ملاقات کی تھی اور بتایا تھا کہ یہاں سے جانے کے بعد اپنے اپنے گھروں میں کورنٹائن کریں، انہوں نے اس بات کی بھی یقین دھانی کرائی تھی کہ آج جن لوگوں کے رپورٹس نہیں آئے ہیں، اُن سب کے رپورٹس اگلے ایک دو دن میں آجائیں گے ۔
96 لوگ صحت مند ہوکر اسپتال سے ڈسچارج: بھلے ہی کورونا پوزیٹیو کے معاملات دن بدن بڑ ھ رہے ہوں، لیکن لوگ صحت مند ہوکر اسپتالوں سے ڈسچارج ہونے کی تعداد بھی کم نہیں ہے، آج ایک ہی دن 96 لوگ صحت یاب ہوکر کوویڈ کیر سینٹر یا اسپتال سے ڈسچارج ہوکر اپنے گھر پہنچ گئے ہیں۔ ذرائع سے ملی اطلاع کے مطابق کمٹہ سے 29، یلاپور سے 22، کاروار سے 18، ہوناور سے 15، بھٹکل سے 5، انکولہ ، سرسی اور ہلیال سے دو دو لوگوں کی رپورٹس نیگیٹیو آنے کی بنیاد پر آج اپنے اپنے گھر پہنچ چکے ہیں۔
خیال رہے کہ اب تک اُترکنڑا میں کورونا کے 1335 معاملات درج ہوئے ہیں جس میں سے اب تک 616 لوگ صحت مند ہوکر اپنے گھر جاچکے ہیں، 13 لوگوں نے اپنی جانیں گنوائیں ہیں، جبکہ ابھی بھی 706 کورونا کے کیسس ایکٹیو ہیں اور انہیں یا تو کوویڈ کیر سینٹرس یا اسپتالوں میں ایڈمٹ کیا گیا ہے۔