گریٹر نوئیڈا،11نومبر(آئی این ایس انڈیا)مغربی یوپی کو ہریانہ سے جوڑنے والے ایسٹرن پیرفیرل ایکسپریس وے پر اتوار دیر رات ہوئے حادثہ میں 6 لوگوں کی موت ہو گئی۔مرنے والوں میں 2 خواتین اور 2 بچے بھی شامل ہیں۔اس کے علاوہ 8 لوگ بری طرح زخمی ہوئے ہیں۔یہ حادثہ گریٹر نوئیڈا کے تھانہ مقام 5 علاقے میں ہوا۔ہریانہ کے بلبھ گڑھ سے شادی کی تقریب سے واپس آ رہے 13 افراد ایکو گاڑی میں سوار تھے۔اسی دوران ایک نامعلوم گاڑی نے کار میں پیچھے سے مارا اور فرار ہو گیا۔بلند شہر کے میٹھاپور گلاؤٹھی کے رہنے والے خاندان میں اس واقعہ سے ماتمی ماحول پسر گیا ہے۔حادثے میں ایکو وین ڈرائیور سمیت 6 افراد کی موت ہوئی ہے۔مرنے والوں کی شناخت 60 سالہ شمشیر، یاسین (48)، شمائلہ (15)، شاکر (25)،ریحانہ(18) اور 28 سالہ فرزانہ کے طور پر ہوئی ہے۔ان کے علاوہ 7 لوگ بری طرح زخمی ہوئے ہیں، جن کی شناخت 84 سالہ فرحان، ریحان (16)، ربیان (5)، شبنم (38)، اقصیٰ (6)، مشرف (19) اور سدرہ (11) کے طور پر ہوئی ہے،تمام لوگ بلند شہر کے میٹھاپور گلاوٹھی بلاک کے ہی رہنے والے ہیں اور آپس میں رشتہ دار ہیں۔اس کے علاوہ گریٹر نوئیڈا میں ہی ایک اور حادثے میں 4 افراد کی موت ہو گئی۔سکندرآباد کوتوالی علاقے کے رام لال گڑھی کے قریب تیز رفتار ویگنار کار اتوار دیر رات ٹرک کے پیچھے جا گھس گئی،جس کی وجہ سے کار میں سوار چار نوجوانوں کی موقع پر ہی موت ہو گئی، جبکہ ایک نوجوان شدید زخمی ہو گیا،کار میں سوار لوہارلی گاؤں رہائشی پنکج، رام کمار، راہل، سبھبر کی موقع پر ہی موت ہو گئی۔