منگلورو میں تلواروں سے دھمکا کر شرپسند چار گائے چرا لے گئے
منگلورو9/دسمبر (ایس او نیوز)موڈو شیڈے گرام پنچایت کی عمارت میں سو رہے ایک شخص کو تلواروں سے دھمکا کر وہاں موجود چار گائیں چرا لے جانے کی واردات پیش آئی ہے۔
بتایاجاتا ہے کہ چرائی گئی گائیں موڈو شیڈے کے رہنے والے کیشوا جوگی کی ملکیت تھیں۔ جوگی ڈیری کے کاروبارکے ذریعے اپنی زندگی گزر بسر کرتا ہے۔ لیکن پتہ چلا ہے کہ گزشتہ دوسال کے عرصے میں کیشوا جوگی کی پالی ہوئی 9گائیں چرالی گئی ہیں۔
مویشی چوری کے تازہ واقعے کے بارے میں بتایاجاتا ہے کہ کیشوا جوگی کی چار گائیں گزشتہ دو دن سے اپنے باڑے میں واپس نہیں لوٹی تھیں اور پاس ہی پنچایت بلڈنگ کے قریب گھاس چرتی رہی تھیں۔ پنچایت بلڈنگ کے احاطے میں سونے والے ایک شخص نے 8دسمبر کی رات 3بجے کے قریب دیکھا کہ ایک آٹو رکشہ پنچایت عمارت کے پاس چکر لگا کر نکل گیا۔ پھر 3.30بجے دو موٹر کاریں وہاں پہنچیں۔ اس میں سے سات افراد اترے اورانہوں نے تلواریں دکھا کر وہاں سونے والے شخص کودھمکایا کہ وہ شور مچانے کی کوشش نہ کرے۔ اس کے بعد ان لوگوں نے یک زائیلو ر میں دو گایوں اور دو بچھڑوں کو ٹھونس دیا اور وہاں سے فرار ہوگئے۔ چرائی گئی ان گایوں کی قیمت 75ہزار روپے بتائی جاتی ہے۔
قریب میں لگے ہوئے سی سی کیمرے کی فوٹیج کی بنیاد پر پولیس مجرموں کو پہچاننے اور انہیں گرفتار کرنے کی کوشش کررہی ہے۔